ABATUYE AKARERE KA KARERE BARAKANGURIRWA KUJYA BITABIRA IBIKORWA BY'UBUKORERABUSHAKE

Kuri uyu wa kane tariki 05 Ugushyingo 2026, mu Karere ka Burera habaye ibikorwa binyuranye bisoza Ukwezi kwahariwe ibikorwa by'Abakorerabushake kwateguwe ku nsanganyamatsiko igira iti:"Urubyiruko rw'Abakorerabushake ku isonga mu iterambere ry'umuturage". Mu byakozwe harimo kubakira abatishoboye inzu, ibikoni n'ubwiherero.

Umunyamabanga Nshingwabikorwa w'Akarere, akaba n'Umuyobozi w'Akarere w'agateganyo, Karangwa James n'Umuyobozi w'Ingabo mu Karere, Lt Col Fred Rutayisire bafatanyije y'Urubyiruko n'abandi baturage b'Akagari ka Rurembo, mu Murenge wa Rugarama kubakira umuturage utishoboye inzu mu Mudugudu wa Nyakiriba isimbura iyasenyutse kubera gusaza.

Umunyamabanga Nshingwabikorwa w'Akarere yashimye Urubyiruko rw'Abakorerabushake ku byo bakora biteza imbere imibereho y'abaturage n'iterambere muri rusange; asaba abatuye Akarere muri rusange kujya bitabira ibikorwa by'Ubukorerabushake.

Yagize ati:"Iyo witabiriye ibikorwa by’ubukorerabushake birimo kubakira abafite amikoro make inzu, kubaka ibikorwa remezo nk’Amashuri, guhanga no gutunganya imihanda n’inzira z’imigenderano, gukora no gusana ibiraro; uba utanze umusanzu munini mu guteza imbere abaturage n’Igihugu muri rusange."

Yabakanguriye kwitabira n'izindi gahunda zigamije imibereho myiza zirimo isuku n'isukura, kwizigamira muri EjoHeza, gutanga Mituweli, kwitabira umurimo; bakarangwa no gukora cyane no kunoza ibyo bakora, bagatera imbere.

Lt Col. Rutayisire yababwiye ingaruka zo kunywa Kanyanga n'ibindi biyobyabwenge n'ibinyobwa bitujuje ubuziranenge, abasaba kubyirinda; kandi bakagira uruhare mu kubica batanga amakuru yerekeranye n'ababicuruza.

Yagize ati:"Ibiyobyabwenge n’ibinyobwa bitujuje ubuziranenge bitera ababinywa indwara zinyuranye; kandi bikenesha ababyishoramo kubera ko iyo bifashwe biramenywa; ibindi bigatwikwa. Hari n’ubwo ababitunda bahura n’inzego z’umutekano cyangwa inzego z’ibanze bakabikubita hasi bakiruka. Ayo ni amafaranga baba bakubise hasi."

Igikorwa cyose kijyanye no gucuruza, guhinga, gutundisha, guhindura ibiyobyabwegwe bikoreshejwemo cyangwa binjijemo umwana gukora iyo mirimo bigakorerwa mu gihugu imbere cyangwa bigakorwa ku rwego mpuzamahanga, uwinjije umwana muri icyo gikorwa ahanishwa igihano cy’igifungo cya burundu n’ihazabu y’amafaranga y’u Rwanda arenze miliyoni mirongo itatu ariko atarenze miliyoni mirongo itanu z’amafaranga y’u Rwanda.