ABAVUGA RIKUMVIKANA BO MU MURENGE WA KINONI BASABWE GUFATANYA GUCA BURUNDU ICURUZA N’INYOBWA RY'IBIYOBYABWENGE N’IIBINYOBWA BITUJUJE UBUZIRANENGE

Kuri uyu wa mbere tariki 03 Kanama 2026, Umuyobozi w'Akarere, Mukamana Soline, ari hamwe n'abandi bagize Komite y'umutekano itaguye y'Akarere n'uhagarariye Inama Njyanama y'Akarere bakoranye inama n'Abavuga rikumvikana bo mu Murenge wa Kinoni yabereye ku biro by'Umurenge, mu Kagari ka Ntaruka.

Muri iyo nama yabasabye kurushaho gufatanya kurwanya, bagaca burundu itunda, ikwirakwiza, icuruza n'inyobwa ry'ibiyobyabwenge aho biva bikagera; bagafatanya kandi guca kwenga, gucuruza no kunywa ibinyobwa bitujuje ubuziranenge.

 Yababwiye ati:"Ndabasaba kumenyesha abaturage ingaruka zo kunywa ibiyobyabwenge n’ibinyobwa bitujuje ubuziranenge kuri bo, imiryango yabo no ku muryango Nyarwanda muri rusange, mubagire inama yo kubyirinda, kandi bagire uruhare mu kubirwanya batanga amakuru yerekeye abicuruza."

Yagize ati:"Ndabasaba kandi kurushaho kwegera abaturage, mubamenyeshe gahunda zinyuranye zigamije imibereho myiza y’abaturage n’iterambere muri rusange zirimo isuku n'isukura, kurwanya imirire mibi n'igwingira ry'abana bato, gutanga Mituweli no kurwanya amakimbirane mu miryango."

 Na none kandi, Umuyobozi w'Akarere yasabye Abavuga rikumvikana bo muri uwo Murenge guha abaturage serivise nziza, bakirinda kubaka ruswa cyangwa kubasiragiza igihe baje kwaka serivise, kubumbatira umutekano birinda, kandi barwanya ibyawuhungabanya, gusigasira ubumwe bw'Abanyarwanda bimakaza Ndi Umunyarwanda, kwimakaza umuco w'ibiganiro mu miryango no kwirinda amakimbirane.

Yasabye ababyeyi kwita ku nshingano zabo zo kurera neza abana, kandi bakabohereza kwitabira gahunda yo gukurikirana urubyiruko mu biruhuko aho batorezwa kugira indangagaciro na kirazira by'umuco Nyarwanda zirimo ubutwari no gukunda Igihugu n'abagituye.