MU MURENGE WA GAHUNGA HABEREYE UMUHANGO WO KWAKIRA KU MUGARAGARO IBIKORWA BYAGEZWEHO MU MUSHINGA UGAMIJE KUGABANYA INGARUKA Z’IMYUZURE NO KURWANYA ISURI

Kuri uyu wa kabiri tariki 28 Ukwakira 2026, Umuyobozi w'Akarere, Mukamana Soline , ari hamwe n’Umuyobozi w'Akarere wungirije ushinzwe iterambere ry’ubukungu, Nshimyimana Jean Baptiste yakiriye uwari uhagarariye Ambasaderi wa Japan mu Rwanda, Shinsuke SAITO, uhagarariye Ishami ry’Umuryango w’Abibumbye ryita ku Biribwa n’Ubuhinzi (FAO) mu Rwanda, Mohamed Aw-Dahir, Umuyobozi wungirije w'Akarere ka Rutsiro ushinzwe iterambere ry’ubukungu, Uwizeyimana Emmanuel n’Intumwa ya Minisiteri ishinzwe ibikorwa by’Ubutabazi, Rukebanuka Adalbert mu Murenge wa Gahunga ahabereye umuhango wo kwakira ku mugaragaro ibikorwa byagezweho mu mushinga ugamije kugabanya ingaruka z’imyuzure, kurwanya isuri no kongerera ubushobozi abaturage mu guhangana n’ibiza birimo kubaka umuyoboro w’amazi ufite uburebure bwa kilometero ebyiri n’ikiraro mu Kagari ka Kidakama byakozwe hagamijwe kugabanya ingaruka z’imyuzure no koroshya ingendo z’abaturage.

Icyo kiraro kikaba cyarasenywe n'ibiza byatewe n'imivu y'amazi menshi y’Imvura yaguye muri Gicurasi 2023. Ibyo bikorwa byubatswe ku bufatanye bw'Akarere ka Burera, MINEMA, Rwanda Water Board Authority na FAO/Rwanda.

Yagize ati:"Nk’uko mubizi, Akarere ka Burera  gakunda kwibasirwa  n’ingaruka z’imihindagurikire y’ikirere zirimo inkangu n’isuri. Ibi biza bigira ingaruka ku buzima bw’abaturage; byangiriza, bikanasenya ibikorwa remezo, hanyuma bikagira ingaruka ku musaruro w’ubuhinzi, imibereho myiza y’abaturage n’umutekano w’ibiribwa."

Yagize kandi ati:"Ibiza byibasiye Akarere kacu  muri Gicurasi 2023 byatweretse ko gukumira no kugabanya ingaruka z’ibiza, gucunga neza amazi no kongerera abaturage ubushobozi bwo guhangana n’ibiza ari inshingano ikomeye; kandi isaba ubufatanye bw’inzego zose."

Yongeyeho ati:"Ni muri urwo rwego; uyu mushinga ufite akamaro kanini ku Karere ka Burera kuko ibikorwa byawo bigamije kugabanya ingaruka z’imyuzure n’isuri, kurinda ubutaka n’ibikorwa remezo no gufasha abaturage gukomeza ibikorwa byabo by’ubuhinzi mu buryo burambye." 

Yasabye abaturage bitabiriye uwo muhango gufata neza ibyo bikorwa agira ati:"Turizera ko ibikorwa byubatswe bizabungabungwa neza; kandi bikoreshwe mu buryo burambye. Ni inshingano zacu nk’Ubuyobozi n’abaturage gukomeza kubifata neza."