Kuri uyu wa Gatanu Tariki 06 Gicurasi; ku Gakiriro ka Rugarama kari mu Murenge wa Rugarama habereye Umuhango wo gutanga Impamyabumenyi ku Bantu 200 barimo 46 b'Igitsinagore bahigiye Ububaji,Amashanyarazi no gusudira ; bakaba barize banakora iyi Mirimo (Kwigira ku Mwuga). Ijana (100) bize gusudira,Mirongo Itanu (50) bize Amashanyarazi; abandi Mirongo Itanu (50) bize Ububaji.

Uyu Muhango wayobowe n'Umuyobozi w'Akarere, Mme UWANYIRIGIRA M. Chantal. Witabiriwe n'Abashyitsi barimo uhagarariye Guverineri w'Intara y'Amajyaruguru,Bwana MULISA Morris KAREBA , uhagarariye Rwanda TVT Board (RTB), Mme UMUDAHOGORA Germaine n'Umuyobozi wa Syndicat  des Travailleurs des Entreprises de Construction, Ménuiserie, et  Artisanat (STECOMA),Bwana HABYARIMANA Evariste.

Mu ijambo Umuyobozi w'Akarere, Mme UWANYIRIGIRA M. Chantal yagejeje ku bitabiriye uyu muhango yashimye Ubuyobozi bwa RTB , STECOMA,n'izindi Nzego zagize uruhare mu myigire y'aba Bagenerwabikorwa; asaba abahawe Impamyabumenyi guhanga udushya mu Myuga bakora.

Yagize ati,"Gahunda ya Leta yo gutanga Impamyabumenyi ku bakora Imyuga irimo iyo mukora igamije kongerera ububasha no guhesha agaciro uwukora; ibyo bikamushoboza kuba yapiganirwa Akazi cyangwa Amasoko kubera ko azaba afite Impamyabushobozi."

Mme UWANYIRIGIRA M. Chantal yagize kandi ati,"Mumfashe gushima Umukuru w’Igihugu, Nyakubahwa Paul KAGAME  ku bwa gahunda nyinshi zigamije Iterambere ry’Abaturage n’Igihugu muri rusange zirimo  guteza imbere Imyuga n’Ubumenyingiro."

Yasabye abahawe Impamyabumenyi kwirinda ibintu byose binyuranyije n’Amategeko harimo gutunda Ibiyobyabwenge, kubikwirakwiza, kubicuruza, kubinywa, kubyitera cyangwa kubikoresha mu buryo bumwe cyangwa ubundi; kwambuka Umupaka mu buryo bunyuranyije n’Amategeko; abasaba kandi guteza imbere Isuku n’isukura haba aho batuye, aho bakorera, ahahurira Abantu benshi no ku Mubiri.

Mme UMUDAHOGORA Germaine yashimye Inzego zagize uruhare mu Myigire y’aba 200; asaba abahawe Impamyabumenyi kubyaza umusaruro Ubumenyi bakuye kuri iri Shuri agira ati," Ubumenyi mwungutse bubabere Umusingi wo kwiteza imbere ubwanyu, muteze imbere Imiryango yanyu; munagire uruhare mu Iterambere ry’Igihugu."

Mu ijambo rye, Bwana MULISA Morris KAREBA yagaragaje ko Intara y’Amajyaruguru izakomeza gushyigikira gahunda zigamije guteza imbere Imyuga n’Ubumenyingiro nk’uko biri muri gahunda za Leta.