Guhera tariki 28 Gicurasi 2026 kugera ku wa 03 Kamena 2026, abagize Komite Nyobozi y’Akarere (Umuyobozi w'Akarere, Mukamana Soline, Umuyobozi w'Akarere wungirije ushinzwe iterambere ry’ubukungu, Nshimyimana Jean Baptiste n’Umuyobozi w’Akarere wungirije ushinzwe imibereho myiza y’abaturage, Mwanangu Theophile) bafatanyije na ba Honorable Depite Uwizeye Marie Thérèse, Mpembyemungu Winifrida na Kanamugire James gukemura ibibazo abaturage babagejejeho mu nama bakoranye mu ngendo abo Badepite babarizwa muri Komisiyo y’ubukungu n’ubucuruzi bakoze mu Karere ka Burera muri icyo cyumweru muri gahunda  y’ingendo rusange z’Inteko Ishinga Amategeko zigamije gusura ibikorwa byo kongera umusaruro w’ubuhinzi mu Turere; ibibazo bikeneye ubuvugizi bakaba barabijeje ko bazabigeza ku nzego bireba.

Mu kiganiro Umuyobozi w'Akarere yagiranye n’abaturage bakoranye inama yababwiye serivise nshya ziyongereye kuri Mituweli n’umusanzu utangwa, abakangurira gutanga umusanzu wa 2026-2027, kwizigamira muri EjoHeza, kandi bakongera ubwizigame. 

Yababwiye ibyo urugo rufite isuku rugomba kiba rwujuje; abakangurira kugira isuku ku mubiri, kwita ku isuku y’imyambaro, kurangwa n’isuku aho bakorera, aho bagenda n’ahahurira abantu benshi; bakita kandi ku isuku yo mu kanwa, isuku y’ibyo banywa, ndetse n’ibyo barya.

Yababwiye na none ingaruka zo kunywa Kanyanga, Urumogi n’ibindi biyobyabwenge, abasaba kwirinda kubitunda, kubicuruza no kubinywa, bakagira kandi uruhare mu kubirwanya batanga amakuru yerekeye ababikora.

Yabakanguriye kandi kwitabira umurimo, bagakora cyane; bakiteza imbere, kwimakaza umuco w'ibiganiro mu muryango nk'uburyo bwo gukumira no kurwanya amakimbirane mu miryango; abasaba kubumbatira umutekano no gusigasira ubumwe bw'Abanyarwanda, bakimakaza Ndi Umunyarwanda.

Mu isozwa ry’icyo gikorwa, Umuyobozi w'Akarere yashimye abo Badepite n’Inteko Ishinga Amategeko muri rusange ku bw’icyo gikorwa cyo gusura ibikorwa byo kongera umusaruro w’ubuhinzi, abizeza ko inama zose bagiriye Akarere ka Burera zizashyirwa mu bikorwa.