Muri gahunda y’iminsi ijana yo  Kwibuka ku nshuro ya 32 Jenoside yakorewe Abatusi mu Rwanda mu 1994, kuri uyu wa kane tariki 02 Nyakanga 2026, abagize Urugaga rw’Abikorera mu Karere ka Burera bibutse abikorera bakoreraga muri aka Karere bazize Jenoside yakorewe Abatutsi mu 1994, icyo gikorwa kikaba cyabereye ku Rwibutso rwa Jenoside yakorewe Abatutsi mu 1994 rwa Rugarama, mu Murenge wa Rugarama.

Icyo gikorwa cyitabiriwe n’Umuyobozi w’Akarere, Mukamana Soline, abandi bagize Komite Nyobozi y’Akarere n’abagize Inama y’umutekano itaguye y’Akarere.

Abitabiriye icyo gikorwa basabwe gukomeza gusigasira ubumwe bw'Abanyarwanda, kwimakaza Ndi Umunyarwanda; bakirinda, kandi bakagira uruhare mu kurwanya ingengabitekerezo ya Jenoside, ihakana n'ipfobya ryayo banyomoza abagoreka amateka yerekeye Jenoside yakorewe Abatutsi.

Umuyobozi w’Akarere yabwiye abitabiriye icyo gikorwa ati:"Itegeko Nshinga ry’u Rwanda risobanura ko kwibuka Jenoside yakorewe Abatutsi bijyana n’inshingano yo kurwanya ingengabitekerezo ya Jenoside; rikaba ribivuga muri aya magambo: Twiyemeje kurandura burundu ingengabitekerezo ya Jenoside n’ibyo igaragaramo byose, amacakubiri n’ivangura bishingiye ku moko, ku turere n’ibindi ibyo ari byo byose.

Yabasabye kumufasha gushima izari Ingabo za RPF/INKOTANYI zari ziyobowe na Nyakubahwa Perezida wa Repubulika, Paul Kagame zabohoye Igihugu, zinahagarika Jenoside yakorerwaga Abatutsi.