Mu biganiro Abayobozi mu Karere ka Burera bagiranye n’abaturage bitabiriye inteko z'abaturage uyu munsi babakanguriye kugana abakozi bashinzwe irangamimerere mu Tugari n’Imirenge babahe serivisi bakeneye muri iki cyumweru cy'Irangamimerere kizaba kugera tariki 15/08/2025.

Serivisi zizatangwa muri iyi gahunda zirimo kwandika ababana nk'umugabo n'umugore batarasezeranye bikurikije amategeko bifuza gusezerana, kwandika abana batanditswe mu Irangamimerere, kwandika abapfiriye mu miryango batanditswe, kwemera umwana, kwishingira umwana utari uwawe no kwandika mu bitabo abatandukanye.

Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste yatangirije iyi gahunda mu Kagari ka Kidakama, mu Murenge wa Gahunga mu kiganiro yagiranye n’abaturage bitabiriye inteko b’ako Kagari.

Yagize ati:"Iyi gahunda y’Icyumweru cy'Irangamimerere igamije kurushaho kwegereza abaturage serivisi z’ Irangamimerere. Abakeneye izo serivisi; ndetse n’abacikanwe n’izo serivisi zirimo kwandika abana mu Irangamimerere barasabwa kugana abakozi babishinzwe mu Tugari n’Imirenge babahe serivisi bakeneye."

Yabakanguriye kandi kwitabira gahunda za Leta zirimo kwizigamira muri EjoHeza no kongera ubwizigame, kurangwa n'isuku ahantu hose no gutanga Mituweli; bakirinda ibiyobyabwenge, ubusinzi, amakimbirane n'ibindi binyuranyije n’amategeko birimo ibyateza umutekano muke.

Umuyobozi w’Akarere wungirije ushinzwe imibereho myiza y’abaturage, Mwanangu Théophile yatangirije  iyi gahunda y’Icyumweru cy'Irangamimerere mu Kagari ka Ntaruka, mu Murenge wa Kinoni mu nteko y'abaturage b'ako Kagari; abaganiriza kuri gahunda za Leta zinyuranye zigamije iterambere ry’imibereho yabo n’iterambere ry’Igihugu muri rusange.