Muri gahunda yo Kwibuka ku nshuro ya 31 Jenoside yakorewe Abatutsi mu Rwanda mu 1994 mu bigo; uyu munsi, Umuyobozi w’Akarere, Mukamana Soline; ari kumwe n'Umuyobozi w'Inkeragutabara mu Karere, Lt Col Fred Nyirinkwaya n'Umuyobozi wa Polisi mu Karere, SSP Aphrodis Nkundineza yahaye ikiganiro abakozi b’uruganda rukora imyenda rwa NOGUCHI HOLDINGS Ltd rukorera mu Murenge wa Rugarama ku ngingo ivuga kuri "Jenoside yakorewe Abatutsi mu 1994, Isomo ku Banyarwanda, ku Mahanga n'Ibihugu byo mu Karere".

Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste yagiranye icyo kiganiro n'abakozi ba Kompanyi icukura Gasegereti mu Murenge wa Kagogo yitwa New Bugarama Mining Company Ltd; naho Umuyobozi w’Akarere wungirije ushinzwe imibereho myiza y’abaturage, Mwanangu Théophile yakigiranye n'abakozi b'Ibitaro byigisha byo ku rwego rwa II bya Butaro biri mu Murenge wa Butaro.

Muri icyo kiganiro; abagize Komite Nyobozi basobanuriye abakozi b’ibyo bigo amateka y’u Rwanda mbere y’Ubukoloni, mu gihe cy’Ubukoloni, muri Repubulika ya mbere n’iya kabiri, uko Abanyarwanda bari babanye muri ibyo bihe, icyatumye Jenoside yakorewe Abatutsi iba, uko yateguwe, uko yashyizwe mu bikorwa, ingaruka zayo, uko yahagaritswe, ingamba Igihugu cy’u Rwanda cyafashe kugira ngo itazongera kubaho, aho Igihugu kigeze mu kwimakaza no kubumbatira amahoro, ituze,  umutekano, iterambere, ubumwe n’ubudaheranwa birambye.

Umuyobozi w’Akarere yabwiye abakozi ba NOGUCHI HOLDINGS Ltd ati:"Mbere y’umwaduko w’Abazungu, Abanyarwanda bari bashyize hamwe; biyumva nk’Abenegihugu bahuje umuco; kandi bavuga ururimi rumwe; ari rwo Ikinyarwanda. Bagabiranaga Inka, bagashyingirana; kandi bagatabarana. Abatutsi, Abahutu n’Abatwa byari ibyiciro bishingiye ku rwego rw’imibereho. Abakoloni bageze mu Rwanda, basanze Abanyarwanda bashyize hamwe; bitaborohera kubameneramo; bigira inama yo kubabibamo urwango n’amacakubiri bagendeye kuri ibyo byiciro kugira ngo babashe kubayobora; bigisha ko inkomoka ko Abatutsi, Abahutu n’Abatwa atari imwe. "

Yakomeje agira ati:"Muri izo nyigisho zibiba urwango n’amacakubiri mu Banyarwanda; Abakoloni berekanaga ko Abatutsi ari abanyamahanga, ko ari babi; kandi ko bakandamiza Abahutu; bityo ko bagomba kumeneshwa; bakirukanwa mu Gihugu, kwicwa, ibyabo bikanyagwa, bigasahurwa, bikangirizwa; bagatotezwa mu buryo bunyuranye. Ibyo byigishijwe n’abayobozi kuri Repubulika ya mbere ndetse n’iya kabiri; biza kuvamo Jenoside yakorewe Abatutsi mu mwaka wa 1994; aho Abatutsi basaga Miliyoni bishwe mu minsi ijana."

Mukamana yagize kandi ati:"Ubuyobozi bwiza U Rwanda rufite uyu munsi ni igihamya ko nta Jenoside izongera kuba mu Rwanda. N’ubwo ariko bimeze bityo; haracyari abagifite; kandi bakwirakwiza ingengabitekerezo ya Jenoside, abahakana n’abapfobya Jenoside yakorewe Abatutsi. Ibyo biha buri wese umukoro wo kubarwanya; hagaragazwa ukuri kuri Jenoside yakorewe Abatutsi."

Yasabye abakozi b’ibyo bigo kwirinda; kandi bakarwanya ingengabitekerezo ya Jenoside yakorewe Abatutsi, ihakana n’ibfobya rya Jenoside n'ibindi byabangamira ubumwe n'ubudaheranwa by'Abanyarwanda.