Kuri uyu wa mbere, mu cyumba cy'inama cy'Akarere habereye amahugurwa azamara iminsi ibiri ku Irangamimerere. Uyu munsi, hahuguwe Abanyamabanga Nshingwabikorwa b'Imirenge n'Abanyamabanga Nshingwabikorwa b'Utugari.

Ejo hazahugurwa Umuyobozi w'Ababyaza n'abakozi bashinzwe ibarurishamibare mu Bitaro byigisha byo ku rwego rwa II bya Butaro n'Abayobozi b'Ibigo Nderabuzima. 

Ayatangiza ku mugaragaro, Umuyobozi w'Akarere, Mukamana Soline yasabye abayitabiriye kuyakurikira neza kugira ngo bunguke ubumenyi bwisumbuye mu byerekeye imitangire ya serivisi z'Irangamimerere.

Yababwiye ati:"Aya mahugurwa ni ingenzi kuko azatuma murushaho gutanga neza serivisi ku baturage zerekeye Irangamimerere harimo abaza gusaba icyemezo gisimbura indangamuntu, icyemezo cyo guhinduza izina, gusaba Indangamuntu, gusimbuza Indangamuntu yatakaye, icyemezo cy'umwirondoro wuzuye, icy'ubwenegihugu n’icyemezo cy'uko umuntu ariho."

Yagize kandi ati:" Ndabasaba kuzashyira mu bikorwa ubumenyi muzunguka, kandi muzabusangize abo muhagarariye; bityo tunoze imitangire ya serivisi; kandi tuzamure ibipimo byerekeye Irangamimerere."

Abitabiriye amahugurwa bari guhugurwa n'itsinda ry'abakozi barimo uwo mu Kigo cy’Igihugu gishinzwe kwita ku buzima, Minisiteri y’Ubutegetsi bw’Igihugu n’Ikigo cy’Igihugu gishinwe Indangamuntu.