Uyu munsi, Umuyobozi w’Akarere, Mukamana Soline; ari kumwe n’abandi bagize Komite Nyobozi y’Akarere n’Abayobozi b’Inzego z’Umutekano mu Karere yakiriye ku biro by’Akarere Honorable Senateri Mureshyankwano Marie Rose na Honorable Senateri Uwimbabazi Penine bagaragarijwe ibikorwa mu Karere ka Burera mu korohereza abaturage kubona ibicanwa bitangiza ibidukikije.

Aba Basenateri babarizwa muri Komisiyo y’Iterambere ry’Ubukungu n’Imari mu Inteko Ishinga Amategeko/Umutwe wa Sena baje muri gahunda y’Inteko Ishinga Amategeko/Umutwe wa Sena y’igikorwa cy’iminsi ibiri (11-12/06/2025) cyo kugenzura ibikorwa na Guverinoma mu korohereza abaturage kubona ibicanwa bitangiza ibidukikije.

Asobanura intego y’uruzinduko rwabo , Honorable Mureshyankwano yagize ati:"Muri iki gikorwa cy’ubugenzuzi twahereye ku nama tugaragarizwamo; tunasobanurirwe uko ingamba zo guteza imbere ikoreshwa ry’ibicanwa bitangiza ibidukikije zishyirwa mu bikorwa, tumenye uko abaturage babona ibicanwa n’impamvu bamwe badakoresha ibicanwa bitangiza ibidukikije, tumenye kandi imikoranire y’Inzego z’imitegekere y’Igihugu zegerejwe abaturage, Abafatanyabikorwa bireba mu korohereza abaturage kubona ibicanwa bigezweho."

Yagize kandi ati:"Nyuma y’inama turasura abaturage tugirane na bo ikiganiro cyibanda ku kumenya uko babona ibicanwa; impamvu umubare munini w’abaturage bakomeza gukoresha ibicanwa bikomoka ku biti, tunamenye uko abaturage boroherezwa kubona ibikoresho n’ibicanwa bigezweho n’ubumenyi bwo kubikoresha."

Honorable Senateri Mureshyankwano yongeyeho ko muri uru ruzunduko rwabo bazasuzuma imikoranire n’abafatanyabikorwa batandukanye mu kubona ibikoresho n’ibicanwa bigezweho, imikoranire na Banki Itsura Amajyambere y'u Rwanda (BRD) mu kubona inguzanyo na nkunganire, uko abaturage bitabira kugura ibikoresho n’ibicanwa bigezweho, imbogamizi bahura na zo, ibikorwa n’ibyakorwa mu kuzikemura.

Yavuze ko biteze ko iki gikorwa cy’isuzuma kizatuma bagira amakuru ku buremere bw'ikibazo cy'ibicanwa mu baturage, ibigerwaho mu gushyira mu bikorwa ingamba zo guteza imbere ikoreshwa ry'ibicanwa bitangiza ibidukikije, imikoranire y'inzego bireba n'abafatanyabikorwa mu korohereza abaturage kubona ibicanwa; babishingireho batanga inama ku ngamba zo gukemura ikibazo cy'ibicanwa; bityo abaturage bose bagire ibicanwa bitangiza ubuzima bwabo n'ibidukikije.

Umuyobozi w’Akarere, Mukamana Soline yashimye Inteko Ishinga Amategeko/Umutwe wa Sena ku bw’iki gikorwa cy’isuzuma agira ati:"Nk’uko twabibagaragarije ba Nyakubahwa Basenateri, hari ibikorwa byinshi kandi dukomeje ku bufatanye n’Abafatanyabikorwa banyuranye mu kugeza ku baturage ibikoresho binyuranye bakoresha nk’Iziko bitangiza ubuzima bwabo n’ibidukukije; kandi bitabahenze. Twafashe kandi ingamba z’uko ibyo bikoresho byagera ku baturage bose.

Yababwiye ko inama zabo zizafasha Ubuyobozi bw’Akarere n’Abafatanyabikorwa bako kwihutisha ishyirwa mu bikorwa ry’intego Akarere kihaye mu byerekeye korohereza abaturage kubona ibicanwa bitangiza ibidukikije ndetse n’ishyirwa mu bikorwa rya Gahunda ya Kabiri y'Igihugu yo kwihutisha Iterambere (NST2, 2024-2029) aho Guverinoma yateganyije kongera uburyo bwo kubona ibicanwa n'ikoranabuhanga ryifashishwa mu guteka bitangiza ibidukikije harimo ibikoreshwa mu ngo z'abaturage.

Mu 2025, Guverinoma yashyizeho Politiki y'Ingufu iteganya ibijyanye no guteza imbere ikoreshwa ry'ibicanwa bitangiza ubuzima bw'ababikoresha n'ibidukikije. Iyo politiki iteganya kandi uburyo bwo kunganira abaturage kubona ibicanwa bigezweho birimo Gazi, Biogazi, amashanyarazi, amakara akozwe mu bisigazwa by'ibimera n'imbabura zigezweho ku kiguzi kiboroheye.