Umuyobozi w'Akarere, Mukamana Soline, ari kumwe n’Umuyobozi w’Akarere wungirije ushinzwe imibereho myiza y’abatugage, Mwanangu Théophile yakiriye ba Honorable Senateri Nsengiyumva Fulgence na Mukabalisa Donatille baje mu gikorwa cya Komisiyo ya Sena y'Iterambere ry'Ubukungu n'Imari cyo kugenzura ibikorwa bya Guverinoma mu kwegereza abaturage amazi meza. 

Umuyobozi w’Akarere yabwiye abo Basenateri ko Akarere ka Burera gafite imiyoboro y’amazi 46; muri yo 32 ikaba ikora neza, 8 ikaba ikora ku kigero kigereranyije, 6 ikaba idakora ku mpamvu zinyuranye.

Yababwiye ko umubare w’ingo zibona amazi meza muri metero 500 ari 59,661 bingana na 65%, ingo zifite amazi meza mu rugo zikaba ari 6,066 zingana 6.6%.

Yongeyeho ko ibikorwa byo kugeza amazi meza ku baturage biteganyijwe muri gahunda y’Iterambere ry’Akarere ya 2024–2029 harimo kongera uburyo bwo kubona amazi meza no guhangana n’imihindagurikire y’ikirere, kubaka uruganda rutunganya amazi, gukora kilometero 230 z’imiyoboro mishya y’amazi no kugeza amazi meza mu ngo z’imiryango 5,655.

Umuyobozi w’Akarere yabwiye kandi abo Basenateri ko mu biteganyijwe gukorwa harimo kandi kwitegura impinduka z’ikirere mu bijyanye n’amazi, gukomeza no kunoza sisitemu z’imicungire n’imikorere by’imiyoboro y’amazi, kugabanya amazi atishyurwa cyangwa atinjira mu nyungu no kunoza uburyo bwo gukwirakwiza amazi meza bigizwemo uruhare rw’abaturage.

Yababwiye ko izindi ngamba harimo Igishushanyombonera cy’imikoreshereze y’ubutaka, gukorana n’Abafatanyabikorwa mu kongera inkunga bashyira muri gahunda z’amazi, guhugura abaturage mu bijyanye no gufata neza ibikorwaremezo by’amazi, gahunda yo kubaka za nayikondo zikoresha imirasire no kubungabunga amasoko.

Yongeyeho ko ibindi bizakorwa harimo kubungabunga ahaca imiyoboro y’amazi, kugabanya ikigero cy’amazi akoreshwa nabi, gushyira imbere igikorwa cyo kubara ibikenewe ku midugudu idafite amazi meza no gusana amavomo yangiritse adakora.