Uyu munssi, Umuyobozi w'Akarere, Mukamana Soline yakiriye ba Honorable Senateri Utsa Kayitesi na Ngarambe Téléphore babarizwa muri Komisiyo ya Sena ya Politiki n'imiyoborere muri Sena baje mu gikorwa cyo kugenzura uruhare rw'ihame ry'uburinganire bw'abagore n'abagabo mu guteza imbere Umuryango Nyarwanda.

Ku ikubitiro, abo ba Honorable Senateri bagiranye ikiganiro n'abahagarariye Inzego n'ibyiciro binyuranye mu Murenge wa Ruhunde aho bagaragarijwe uko kubahiriza iryo hame byifashe, bungurana ibitekerezo ku gukemura imbogamizi zigaragara mu ishyirwa mu bikorwa ryaryo.

Bahavuye; basuye imiryango ibiri mu Kagari ka Gaseke irimo uwabanaga mu makimbirane wayaretse nyuma y'inyigisho zinyuranye wagaragaje ko kureka amakimbirane byabaye imbarutso y'iterambere ry'urugo rwabo n'undi ubana mu makimbirane; bawugira inama z'uko ibiyatera byakemuka. 

Nyuma yo kuganira n'iyo miryango, basuye abaturage b'ako Kagari, babaganiriza ku iyubahirizwa ry'ihame ry'uburinganire hagati y'abagabo n'abagore ; bafatanyije n'Umuyobozi w'Akarere; babakangurira kwimakaza ibiganiro hagati yabo no kujya inama ku mikoreshereze y'umutungo. 

Babakanguriye inama yo kwirinda amakimbirane, kurera neza abana bababera urugero rwiza, kwirinda ihohotera ry'uburyo bwose n'ikindi cyose cyatera ubwumvikane buke hagati y'abagize umuryango.