Mu gitondo cyo kuri iki cyumweru tariki 02 Kamena uyu mwaka, abaturage mu byiciro bitandukanye mu Mirenge igize Akarere ka Burera barangajwe imbere n'Abagore bitabiriye Siporo rusange idasanzwe y'abagore yiswe One Million Women Walk ifite insanganyamatsiko iragira iti: "Siporo ni Ubuzima: Abagore Twagiye".

 Umuyobozi w'Akarere, MUKAMANA Soline, Umuyobozi w'Inkeragutabara mu Karere, Lt Col Fred NYIRINKWAYA, Umuhuzabikorwa w’Inama y’Igihugu y’Abagore mu Karere, UWAMWIZA Catherine, Umuyobozi wa Polisi mu Karere, SSP Aphrodis NKUNDINEZA bitabiriye iyi siporo mu Murenge wa Cyeru.

Umuyobozi w’Akarere wungirije ushinzwe imibereho myiza y’abaturage, MWANANGU Theophile yifatanyije n'abaturage b'Umurenge wa Rusarabuye muri iyi siporo.

Mu kiganiro Umuyobozi w'Akarere yagiranye n'abayitabiriye siporo mu Murenge wa Cyeru yabashimiye kuba bayitabiriye ku bwinshi, abasobanurira umwihariko w'iyi siporo; abashishikariza gukomeza kujya bakora siporo no gukundisha abandi kuyikora babasobanurira akamaro kayo.

Yagize ati:" Siporo ni ubuzima. Uyikora imurinda zimwe mu ndwara. Tujye tuyikora kenshi; kandi dukangurira abatayikora kuyikora; tubasobanurire ibyiza byo kuyikora."

MUKAMANA yakanguriye kandi abaturage bitabiriye siporo mu Murenge wa Cyeru kwirinda gutunda, gukwirakwiza, kunywa no gucuruza Kanyanga n’ibindi biyobyabwenge.

Yabashishikarije kandi kwitabira gahunda zigamije imibereho myiza n'iterambere rw’Igihugu, kwitegura neza igikorwa cy'amatora ya Perezida wa Repubulika n'ay'Abadepite azaba kuwa 15/7/2024 basuzuma ko bari kuri lisite y'itora no kwiyimuza kuri lisite y'itora ku babishaka.

Habayeho kandi gupima abafite imyaka hejuru ya 35 indwara zirandura; bamenya uko ubuzima bwabo buhagaze.