Ku gicamunsi cy’uyu wa kabiri, Umuyobozi w'Akarere, Mukanana Soline yitabiriye inteko y'abaturage b'Akagari ka Ntaruka, mu Murenge wa Kinoni; anahasoreza igikorwa cy’ubukangurambaga ku iyubahirizwa ry'ihame ry'uburinganire bw'abagore n'abagabo bwakozwe mu gihe cy'icyumweru.

Umuyobozi w’Akarere wungirije ushinzwe iterambere ry'ubukungu, Nshimyimana Jean Baptiste yitabiriye inteko y'abaturage b’Akagari ka Rugari, mu Murenge wa Rwerere; naho Umuyobozi wako wungirije ushinzwe imibereho myiza y'abaturage, Mwanangu Théophile yitabiriye inteko y’abaturage b'Akagari ka Nyamicucu, mu Murenge wa Butaro.

Mu kiganiro bagiranye n’abitabiriye inteko, abagize Komite Nyobozi y’Akarere (Umuyobozi w’Akarere n’Abayobozi b’Akarere bungirije bombi) babakanguriye kubahiriza ihame ry'uburinganire bw'abagore n'abagabo; baharanira kugira umuryango utekanye, kandi uteye imbere; umuryango utarangwamo imirire mibi n’igwingira ry’abana bato, amakimbirane, ihohotera ry'ubwoko bwose, abana basiba ishuri, ibiyobyabyenge, ubusinzi; umuryango wimakaza ibiganiro hagati y'abawugize, urangwamo isuku, kandi ujya inama ku mikoreshereze n’imicungire by'umutungo.

Umuyobozi w’Akarere yagaragaje akamaro k’ibiganiro hagati y’abagize umuryango agira ati:"Ibiganiro ni uburyo bwiza bwo gukemua ibibazo byagaragaye mu muryango. Twimakaze uwo muco; wo shingiro ry’imibanire myiza, umutekano n’iterambere birambye by’umuryango; tuzirikana ko iterambere ry’Igihugu rishingira ku muryango utekanye kandi uteye imbere."

Bababwiye kandi ko ubushakashatsi bwakozwe n’Urwego rw’Igihugu rw’Imiyoborere muri 2024 rwagaragaje ko mu muryango Nyarwanda hakigaragara ibibazo birimo amakimbirane, guhoza ku nkeke no gutoteza, guharika no gucana inyuma kw’abashakanye, ihohotera rishingiye ku gitsina n’irishingiye ku mutungo, ibibazo bibangamiye uburenganzira bw’abana birimo kubasambanya, inda ziterwa abangavu, guta ishuri, ubuzererezi no kubakoresha imirimo itemewe; babasaba kubyirinda no kubikemura.

Babakanguriye kwitabira n’izindi gahunda za Leta zigamije imibereho myiza y’abaturage n’iterambere ry’Igihugu muri rusange zirimo kwizigamira muri EjoHeza, gutanga Mituweli, kwitabira umurimo, kuwunoza no guhanga ibishya bakiteza imbere, guhinga kuri site z’ubuhinzi ibihingwa byatoranyijwe, kugenzura ko amakuru yerekeye imiryango yabo yuzuye muri Sisiteme IMIBEREHO, gusigasira gahunda ya Ndi Umunyarwanda babumbatira ubumwe n’ubudaheranwa by’Abanyarwanda. Abitabiriye inteko baganirijwe kandi ku itegeko rigenga abantu n’Umuryango.