Kuri uyu wa mbere, mu Karere ka Burera hatangijwe icyumweru cyahariwe kwita ku buzima bw'Umubyeyi n'Umwana cyateguwe ku insanganyamatsiko igira iti:"Hehe n'igwingira. Twite ku buzima bw'Umubyeyi n'Umwana." 

Umuyobozi w'Akarere, Mukamana Soline ari hamwe n’Umuyobozi w’Akarere wungirije ushinzwe imiberehp myiza y’abaturage, Mwanangu Theophile n’abagize inama y’umutekano itaguye y’Akarere yakiriye Guverineri w'Intara y'Amajyaruguru, Mugabowagahunde Maurice mu Murenge wa Kinoni wahatangirije ku rwego rw'Intara iyi gahunda. 

Mu bizakorwa muri iki cyumweru cyahariwe kwita ku buzima bw'Umubyeyi n'Umwana harimo gupima abana imikurire, kubakingira no kubaha ibinini by'inzoka.

Mu ijambo rye, Guverineri Mugabowagahunde yasabye abatuye Akarere ka Burera kwita ku buzima bw’umwana harimo kwisuzumisha inda inshuro umunane, kubyarira kwa Muganga, gukingiza abana inkingo zose no kurwanya imirire mibi mu bana bato; yibutsa ko imirire mibi itera umwana kugwingira mu gihagararo ndetse no mu bwenge; kandi ko umwana wagwingiye bigira ingaruka mbi ku hazaza he ndetse n’iterambere ry’Igihugu.

Yasabye kandi kwita ku buzima bw’Umubyeyi arindwa ihohotera aho riva rikagera; agaragaza ko guhohotera Umubyeyi utwite bigira ingaruka ku mwana; yaba mu gihe atwiswe; ndetse na nyuma yo kuvuka.  

Mu kiganiro yagiranye n’abatuye Umurenge wa Kinoni, Guverineri Mugabowagahunde yababwiye ati:" Ikindi ngira ngo tuganireho ni uguhindura imyumvire kuri bamwe mu Babyeyi bumva bataganiriza abana babo ibijyanye n’ubuzima bw’imyororokere. Iyo utabahaye amakuru y’ukuri ku byerekeye imihindagurikire y’ubuzima bwabo; abashaka kubasambanya babaha amakuru y’ibinyoma cyangwa atuzuye. Kubaha amakuru y’ukuri ku mihindagurikire y’ubuzima bwabo no kubasobanurira uko bigenda ni ukubarinda ibishuko bitandukanye. "

Yagize kandi ati:"Guha abana amakuru ajyanye n’ubuzima bw’imyororokere ni ukubarinda gusambanywa; biviramo bamwe gutwara inda; hanyuma bakaba Abana barera abandi bana. Umukoro wo gukumira no kurwanya ihohoterwa rikorerwa abana ukwiriye kuba uwa buri wese."

Asoza ijambo rye, Guverineri Mugabowagahunde yasabye abatuye Akarere ka Burera kugira isuku umuco, kurwanya imirire mibi n'igwingira ry'Abana bato bategura indyo yuzuye, kwirinda ibiyobyabwenge, ubusinzi n’amakimirane; abasaba kandi kuzitabira ibiganiro biteganyijwe muri iki cyumweru cyahariwe kwita ku buzima bw'Umubyeyi n'Umwana.