Kuri uyu wa gatanu tariki 04 Kanama uyu mwaka; mu Mirenge igize Akarere ka Burera habereye ibirori byo kwizihiza umunsi mukuru w'Umuganura wizihijwe ku nsanganyamatsiko igira iti:"Umuganura, isôoko y’ubumwe n’ishingiro ryo kudaheranwa".

Ku rwego rw'Akarere wizihirijwe mu Kagari ka Gitovu,Umurenge wa Ruhunde; aho Umuyobozi w'Akarere, UWANYIRIGIRA Marie Chantal, Umuyobozi w'Ingabo mu Karere n'abandi Bayobozi mu Karere n'Umurenge wa Ruhunde bifatanyije n'Abaturage mu birori byo kuwizihiza.

Umuyobozi w’Akarere wungirije ushinzwe iterambere ry’Ubukungu, NSHIMYIMANA Jean Baptiste; ari hamwe n'Ubuyobozi n'abahagarariye Inzego zitandukanye mu Murenge wa Butaro yifatanyije n'Abaturage b'uyu Murenge kwizihiza uyu munsi mukuru mu birori byabereye mu Kagari ka Nyamicucu ; naho Umuyobozi w’Akarere wungirije ushinzwe iterambere ry’imibereho myiza y’Abaturage, MWANANGU Theophile; ari hamwe n'Ubuyobozi n'abahagarariye Inzego zitandukanye mu Murenge wa Kinoni yifatanyije n'Abaturage b'uyu Murenge kwizihiza uyu munsi mukuru mu birori byabereye mu Kagari ka Ntaruka.

Mu butumwa Umuyobozi w'Akarere, UWANYIRIGIRA Marie Chantal yagejeje ku Baturage b’Umurenge wa Ruhunde bitabiriye ibirori byo kwizihiza uyu munsi mukuru ko Umuganura ugira uruhare mu kunga no gushimangira ubumwe bw'Abanyarwanda; abasaba kurushaho gushyira hamwe imbaraga, gufashanya no gutabarana; cyane cyane mu bihe by’amage no gukomeza kurangwa n’umuco w’ubudaheranwa n’izindi ndangagaciro.

Yagize ati:" Umuganura ni umwanya wo kuganuza abatarahiriwe n’ibihe ; by’umwihariko abagizweho ingaruka n’ibiza no kuganuzanya muri rusange nk’uko byahoze mu muco Nyarwanda."

Umuyobozi w'Akarere yasabwe kandi Abaturage bitabiriye ibi birori kurangwa n’umuco wo gukora cyane hagamijwe kwikura mu bukene; abasaba kandi kwirinda ubusinzi, Ibiyobyabwenge, amakimbirane, ihohotera ry'ubwoko bwose no kwitabira gahunda zigamije iterambere ry'imibereho yabo zirimo EjoHeza, Isuku n'isukura, gutanga ku gihe umusanzu wa Mituweli no kuringaniza urubyaro.

Mu byaranze ibirori byo kwizihiza uyu munsi mukuru mu Karere ka Burera harimo koroza imwe mu miryango itishoboye; ikaba yahawe amatungo magufi ; mu borojwe hakaba harimo imiryango icyenda yo mu Mirenge ya Nemba na Ruhunde yorojwe n'Urwego rwa DASSO mu Karere ka Burera; rukaba rwayihaye intama.

Ibindi byaranze umuganura mu Karere ka Burera (Amafoto) : 

Umuyobozi w'Akarere, Umuyobozi w'Akarere, UWANYIRIGIRA Marie Chantal asuhuza umwe mu Baturage bitabiriye ibi birori mu Murenge wa Ruhunde .

Abayobozi basabana n'Abaturage:

Abaturage baganuzanya:

Abayobozi basangira n'Abaturage :