Mu nama yabereye uyu munsi mu cyumba cy’inama cy’Akarere yahuje abagize Komite Nyobozi y'Akarere, abagize Biro y'Inama Njyanama ku rwego rw'Imirenge n'Abanyamabanga Nshingwabikorwa b'Imirenge, Umuyobozi w'Akarere, Mukamana Soline yabasabye kurushaho gufatanya bagakemura ibibazo bibangamiye iteranbere ry’imibereho y’abaturage.

Mu bibazo yasabye abitabiriye inama ndetse n’abandi Bayobozi mu Mirenge gufatanya gukemura harimo ikibazo cy’isuku nkeya igaragara hamwe na hamwe mu Karere, imirire mibi n’igwingira ry’abana bato; itundwa, icuruzwa, inyobwa n’ikoreshwa ry’ibiyobyabwenge birimo Kanyanga; amakimbirane mu miryango; ubuzererezi, ubusinzi, ubuharike, gusesagura umutungo w’umuryango n’ihohotera ry’uburyo bunyuranye.

Yagize ati:" Ndabasaba kujya musesengura ibibazo bihari; hanyuma mufatire hamwe ingamba z'uburyo byakemuka mu buryo burambye. Nitwuzuzanya mu nshingano; kandi tugasenyera umugozi umwe tuzabasha gukemura ibibazo bibangamiye imibereho myiza y’abaturage; kandi birashoboka. 

Yibukije Ababyeyi ko Abanyeshuri bagiye kujya mu biruhuko bisoza umwaka w’amashuri wa 2024-2025 agira ati:"Ababyeyi dukwiriye kwita ku nshingano zacu zo kurera Abana bacu neza; tubatoza indangagaciro na kirazira by’Umuco Nyarwanda; tukabarinda ubuzererezi n’ibishuko bahura na byo mu biruhuko; tukirinda kandi kubakoresha imirimo ivunanye; kandi itemewe."

Umuyobozi w'Akarere yasabye abitabiriye inama gushyira mu bikorwa ingamba bafashe; kandi bakageza ku bo bahagarariye imyanzuro yafatiwe mu nama; bityo abaturage b’Akarere ka Burera bagire imibereho myiza; kandi bagere ku iterambere.

Yabasabye kandi gukangurira abaturage kwitabira gahunda za Leta zigamije imibereho myiza n’iterambere muri rusange zirimo isuku n’isukura, kwizigamira muri EjoHeza no kongera ubwizigame, kurwanya ibiyobyabwenge, imirire mibi n’igwingira ry’abana bato.