Mu nama y’Uburezi ku rwego rw’Akarere yabereye mu cyumba cy’Akarere ku wa gatanu tariki 03 Mutarama 2025, Umuyobozi w'Akarere, Mukamana Soline wayiyoboye yasabye abayitabiriye gufatanya kugira ngo abanyeshuri bose bazitabire ishuri ku gihe mu gihembwe cya II cy’amashuri cy’umwaka w’amashuri wa 2024-2025, ndetse no kugira ngo icyo gihembwe cy’amashuri kizagende neza muri rusange.

Umuyobozi w'Akarere yayoboye iyi nama ari kumwe n'abandi bagize Komite Nyobozi y'Akarere. Uretse kungurana ibitekerezo ku kunoza imyiteguro yerekeye itangira ry'igihembwe cya kabiri cy'amashuri; abitabiriye inama bagaragarijwe ibyavuye mu bugenzuzi bwakozwe mu bigo by'Amashuri mu kwezi gushize.

Inama yitabiriwe n'Abayobozi b'Ibigo by'Amashuri, Abayobozi b'Ibigo by'amashuri bungirije (Ushinzwe amasomo n'ushinzwe imyitwarire), Abagenzuzi b'uburezi mu Mirenge n'abakozi bashinzwe isuku n'ubuzima ku rwego rw'Imirenge. 

Nyuma yo kungurana ibitekerezo ku ngingo zaganiriweho, abitabiriye inama bafashe ingamba zigamije imigendekere myiza y'itangira ry'igihembwe cya kabiri cy'amashuri harimo kunoza isuku mu bigo by'Amashuri, ubuziranenge bw'ifunguro rihabwa abanyenyeshuri, guhanga udushya tuzamura imitsindire y'Abanyeshuri no kuzafatanyiriza hamwe kugira ngo Abana bose bazitabire ku gihe ishuri muri iki gihembwe cy’amashuri kizatangira tariki 06 Mutarama 2025.

Umuyobozi w’Akarere yabwiye abitabiriye inama ati:"Dufatanye gukangurira Ababyeyi kuzohereza Abanyeshuri ku ishuri nk’uko gahunda y’Igihembwe cya kabiri iteguye; kandi babahe ibyangombwa nkenerwa; mubakangurire kandi kunganira gahunda yo kugaburira Abanyeshuri ku Ishuri saa sita. Dufatanye na none gukundisha Abana Ishuri; tubereka akamaro ko kwiga, tubasabe kwirinda ibishuko byabangamira ahazaza habo heza."

Yababwiye kandi ati:"Ku munsi w’itangira ry’igihembwe cya kabiri, tuzakurikirane; kandi tugenzure ko nta Munyeshuri wasibye Ishuri. Uwo tuzabona atagiye ku Ishuri; tuzahite tumujyanayo. Dufatanye iyi nshingano nziza yo kurerera neza Igihugu; bityo dutegure Abayobozi beza bo mu bihe bizaza, tunategure Abaturage beza bazigirira; banagirire Igihugu akamaro." 

Muri iyi nama kandi, Umuyobozi w'uruganda rukora imyenda; rukorera mu Murenge wa Rugarama, rwitwa NOGUCHI HOLDINGS Ltd, Hitimana Saidi yagaragarije abayitabiriye ibyo urwo ruganda rukora; abashishikariza gukunda ibihakorerwa ndetse n'ibikorerwa mu Rwanda muri rusange.