Mu nama y’Uburezi yaguye ku rwego rw’Akarere yabereye mu cyumba cy’Akarere ku wa kane, Umuyobozi w'Akarere, Mukamana Soline wayiyoboye yasabye abayitabiriye gufatanya kugira ngo abana bose bageze igihe cyo kwiga n’abasanzwe biga bitabire ishuri; hakirindwa ko hagira abarisiba cyangwa abarivamo.

Yayoboye iyi nama ari kumwe n’Umuyobozi w’Akarere wungirije ushinzwe imibereho myiza y’abaturage, Mwanangu Théophile, Umuyobozi w’Imirimo rusange mu Karere, Habaguhirwa Jean Pierre n’uwari uhagarariye Umuyobozi wa Polisi muri iyO nama , Assistant Inspector of Police (AIP) NYIYIBIZI Laurent.

Yitabiriwe n’abakozi bakorera ku rwego rw'Akarere mu ishami ry'Uburezi, Abayobozi b'Ibigo by'Amashuri, abakozi bashinzwe uburezi mu Mirenge, ba Nyir’Ibigo by’Amashuri, n’abashinzwe Amasomo mu bigo by’amashuri.

Abayitabiriye barebeye hamwe uko umwaka w’amashuri wa 2025/2026 watangiye, ishusho y’uburezi n’ibibazo bibangamiye ireme ry’uburezi mu Karere ka Burera, imitsindire y’abanyeshuri mu byiciro byose n’imihigo y’abayobozi b’ibigo n’abarezi. Bahawe kandi ikiganiro ku micungire y’abakozi bo mu rwego rw’uburezi.

Nyuma y’ibiganiro, abitabiriye inama bunguranye ibitekerezo; kandi bafata ingamba zigamije kugira ngo abana bose bageze igihe cyo kwiga n’abasanzwe biga bitabire ishuri; kandi hakumirwe ko hagira abarisiba cyangwa abarivamo, kuzamura imitsindire no gukemura ibibazo bibangamiye ireme ry’uburezi. 

Mukamana yagize ati:" Iyo amashuri atangiye; hari abana batitabira ishuri; yewe n’abitabiriye ishuri; bamwe ntibaza kwiga bitewe n’impamvu zirimo kuba hari bamwe mu babyeyi basibya abana ishuri kugira ngo babafashe imirimo imwe n’imwe. Abana batitabiriye ishuri imiryango baturukamo iba izwi. Ndabasaba gufatanya n’izindi nzego mu Mirenge; mukurikirane, mumenye igitera abana gusiba cyangwa kuva mu ishuri; muganire n’abo bana ndetse n’ababyeyi babo, hanyuma mufatanye gukemura icyo kibazo abana basubire mu ishuri; kandi barigumemo."

Yababwiye ingaruka umwana usiba ishuri n’urivamo ahura na zo agira ati:"Iyo umunyeshuri asibye ishuri; birumvikana ko hari ibyo abandi banyeshuri bitabiriye ishuri bigishijwe uwasibye atamenye. Mujye mwereka ababyeyi ko muri ibi bihe umurage mwiza ku mwana ari ukumwohereza ku ishuri aho akura ubumenyi butuma yibeshaho; agateza imbere umuryango; akagira n’uruhare mu iterambere ry’Igihugu."

Yababwiye ko bamwe mu bana bareka ishuri bishora; cyangwa bagashorwa mu bikorwa binyuranye bitemewe n’amategeko harimo ubujura; gutunda no gukwirakwiza Kanyanga, Urumogi n’ibindi biyobyabwenge; agaragaza ko ingaruka zo gusiba ishuri cyangwa kurivamo zitagera gusa ku munyeshuri; zigera no ku muryango we n’Igihugu muri rusange kubera ko ibikorwa binyuranyije n’amategeko bikorwa n’abo bana bidindiza iterambere ry’umuryango we; bikanagira uruhare mu kudindiza iterambere ry’Igihugu muri rusange.