Kuri uyu wa Kabiri Tariki 28 Nzeri, Umuyobozi w’Akarere ka Burera wungirije ushinzwe Iterambere ry’Ubukungu,Bwana MUNYANEZA Joseph  yatangije ku mugaragaro igikorwa cya gahunda y’Akarere yo gutera Ibiti Miliyoni Eshatu z’Ibiti bya Kawa uyu Mwaka mu Mirenge Icumi muri Cumi n’Irindwi igize aka Akarere.

Umuhango wo gutangiza iyi gahunda wabereye mu Kagari ka Kamanyana, Umurenge wa Cyanika ; aho NKUNZIMANA   Cyprien utuye mu Mudugudu wa Nyarutosho yabimburiye abandi mu gutererwa Kawa mu Murima we yahisemo akanawutunganya.

Pepiniyeri y’Ibiti bya Kawa bizaterwa yateguwe ku bufatanye bw’Akarere ka Burera n’Umufatanyabikorwa witwa EASY WAY Ltd.

Atangiza iyi gahunda yo gutera Kawa mu Karere ka Burera, Umuyobozi wako wungirije ushinzwe Iterambere ry’Ubukungu yavuze ko guhinga Kawa biri mu Mihigo y’Akarere ka Burera; ashimira  EASY WAY Ltd ku ruhare rwayo mu gutuma Akarere gatangira gushyira mu bikorwa uyu Muhigo.

Mu butumwa yagejeje ku bitabiriye iki gikorwa, Umuyobozi w’Akarere wungirije ushinzwe Iterambere ry’Ubukungu, Bwana MUNYANEZA Joseph   yagize ati:"Kawa ni Ubukungu; Kawa ni Amadevize; aho Amadevize ageze Ubukene burahunga; kandi iyo Umuturage ateye imbere; Igihugu gitera imbere."

Bwana MUNYANEZA Joseph yagaragaje ko gahunda y’Akarere ka Burera yo guhinga Kawa bijyanye na gahunda y’Igihugu yo kongera ingano y’Ibihingwa Ngengabukungu byoherezwa mu Mahanga; asaba  Abaturage kwita no gufata neza Kawa bagiye guhinga bazifumbira; bazikorera n’ibindi bituma zitanga Umusaruro mwiza kandi mwinshi; aho bagize Ikibazo bakagisha inama Abashinzwe Ubuhinzi mu Mirenge .

Mu ijambo rye, Umuyobozi wa EASY WAY Ltd, Bwana MWUMVANEZA Ernest yavuze ko Ubwoko  bwa Kawa (Arabica) bugiye guhingwa mu Karere ka Burera bubereye ibice buzahingwamo; asaba abazazihinga kwita cyane kuri iki Gihingwa Ngengabukungu.

Bwana MWUMVANEZA yagize ati:"Kawa iyo uyitayeho uko bikwiriye ubona Umusaruro mwiza; kandi mwinshi. Abagiye kuyihinga muzayiteho uko bikwiriye mukurikiza Inama mugirwa n’Abashizwe Ubuhinzi; kandi igihe igize Ikibazo mukihutira kubibamenyesha kugira  ngo bagikemure mu maguru mashya."

Ubwo yahabwaga ijambo, NKUNZIMANA yashimye Umukuru w’Igihugu ku bwa gahunda nyinshi zigamije guhindura Imibereho y’Umuturage ikarushaho kuba myiza zirimo n’iyi yo kugeza  Ingemwe za Kawa ku batuye Akarere ka Burera hagamijwe kugira ngo iki Gihingwa Ngengabukungu kirusheho kubateza imbere.

Yagize ati:"Babyeyi bagenzi banjye mwitabiriye uyu muhango; nk’uko Umubeyi araga Umwana we Inka cyangwa Isambu; mutyo twitabire iyi gahunda yo gutera Kawa; bityo tuzarage abadukomokaho iki Gihingwa  Ngengabukungu."