Umuyobozi w’Intara y’Amajyaruguru, Bwana Gatabazi Jean Marie Vianney, kuri uyu wa gatandatu tariki 27 Gashyantare yatangije ku mugaragaro igikorwa cyo gutunganya Igishanga cya Kamiranzovu giherereye mu kagari ka Rusumo, Umurenge wa Butaro,mu Karere ka Burera; bikaba biteganyijwe ko abarenga magana inani (800) bazahabwa imirimo mu iki gikorwa kizamara amezi atandatu(6).

Iki gishanga kiri ku buso bwa hegitari 465; ari na zo zizatunganywa, gihingwamo Imyaka itandukanaye; muri yo harimo Ibishyimbo, Imboga, Ibirayi n’Ibigori.

Abayobozi bitabiriye iki gikorwa bakiriwe n’Umuyobozi w’Akarere ka Burera, Madame Uwanyirigira Marie Chantal wababwiye inyungu Akarere n’Abagatuye biteze ku itunganywa ry’iki gishanga.

Mu bitabiriye itangizwa ry’iki gikorwa harimo Dr Bucagu Charles; akaba ari Umuyobozi Mukuru Wungirije ushinzwe Ubuhinzi mu Ikigo cy’Igihugu gishinzwe Iterambere ry’Ubuhinzi n’Ubworozi (RAB).

Mu kiganiro Umuyobozi w’Intara y’Amajyaruguru, Bwana Gatabazi yagiranye n’Abaturage bari mu mirimo yo gutungaya iki gishanga yabanje gushima Perezida wa Repubulika, Nyakubahwa Paul Kagame ku bikorwa bigamije gutanga akazi ku bantu benshi hagamijwe gukura abaturage mu bukene.

Bwana Gatabazi yagize ati:"Ibikorwa nk’ibi by’Iterambere tubikesha Politike nziza y’Umukuru w’Igihugu cyacu , Nyakubahwa Paul Kagame. Imirimo mwahawe; ndetse n’abandi bazahabwa muri iki gishanga izababere umusingi w’Iterambere n’Imibereho myiza mwirinda kwishora mu Biyobyabwenge; dore ko ababifatirwamo bisobanura bavuga ko baba bashaka imibereho."

Yasabye Urubyiruko kudapfusha ubusa amahirwe babonye y’Imirimo; aha akaba yaragize ati:"Igihe ubonye amahirwe nk’aya aguhesha amafaranga; ukwiriye kuzirikana ko atazahoraho. Amafaranga muzahembwa mu muzayashore mu bikorwa bibabyarira inyungu."

Umuyobozi w’Intara y’Amajyaruguru, Bwana Gatabazi yabwiye abaturage bari aho ko gutunganya iki gishanga bifite inyungu irambye kubera ko ibikorwa by’Ubuhinzi bikorerwamo bidahagarikwa n’Ibihe by’ihinga birangwa n’izuba ryinshi; kubera ko usibye kuba ari mu gishanga; hari n’amazi ahagije yo kwifashisha mu mirimo ikorerwamo.

Mu nama yagiriye Ubuyobozi bw’Akarere ka Burera n’Umufatanyabikorwa wako mu gukurikirana ibikorwa byo gutunganya iki gishanga; ari we Minisiteri y’Ingabo z’Igihugu (MOD) binyuze mu Mutwe w’Inkeragutabara (Reserve Force-RF) harimo gutera urubingo ku magidi y’Umuyoboro w’Amazi anyura muri iki gishanga.

Umuyobozi w’Akarere ka Burera, Madame Uwanyirigira yunze mu ry’Umuyobozi w’Intara y’Amajyaruguru, Bwana Gatabazi agira ati:" Ndabanza gishimira Umukuru w’Igihugu cyacu, Nyakubahwa Paul Kagame ku bikorwa byinshi bigamije guteza imbere Umuturage; iki gikorwa gitangijwe uyu munsi kikaba ari kimwe muri byo. Murasabwa kutamutenguha. Muzitabire ku bwinshi iki gikorwa; kandi amafaranga muzahembwa muzirinde kuyasesagura; ahubwo muyashore mu bihindura imibereho yanyu ikaba myiza."

Dr Bucyagu yabwiye Abagenerwabikorwa b’iki gishanga ko ibikorwa nk’ibi bihenda Leta; abasaba kwiringa kubyangiza agira ati:"Gufata neza iki gishanga bibafitiye inyungu kubera ko nta gihe muzigera murengwa n’ihinga."

N’umunezero mwinshi , umwe mu bahawe akazi muri iki gishanga cya Kamiranzovu witwa Nyirahabimana Godelive yavuze ko yiteze ko kizahindura imibereho ye ikaba myiza ndetse n’iy’umuryango we muri rusange.

Yabivuze muri aya magambo ati:" Kuba mbonyemo akazi kazamara amazi icyenda, nta kabuza nzakuramo Amafaranga atari make nzashora mu bikorwa bitandukanye by’Iterambere."

Mafurebo Ildephonse na we ni umwe mu bahawe akazi mu bikorwa byatangijwe byo gutunganya iki gishanga; uyu na we yavuze ko aya mahirwe yo kubona akazi atazayatera inyoni.

Uyu mugabo uri mu myaka mirongo itatu irenga yagize ati:"Mu byo nzakoresha Amafarnga nzakura muri ibi bikorwa by’amaboko harimo kugura agasambu."