Kuri uyu wa Gatanu Tariki 18/03/2022, Minisitiri wa Minisiteri y’Ubutegetsi bw’Igihugu (MINALOC) ,Hon. GATABAZI Jean Marie Vianney yatangije ku mugaragaro Ikigo Mbonezamikurire cy’Abana Bato mu Kirombe cya GIFURWE Wolfram Mining and Processing Ltd kibarizwa mu Murenge wa Rugendabali aharererwa Abana 30 barimo ab’Abakozi bakora muri iki Kirombe n’Abana baturuka  mu Miryango igituriye.

Iri Rererero ryubatswe n'Ikirombe cya GIFURWE  Wolfram Mining & Processing Ltd nk'uruhare rwacyo muri gahunda ya Leta ijyanye no kubaka Amarerero y'Abana Bato yujuje ibisabwa. Uyu muhango witabiriwe na Guverineri w’Intara y’Amajyaruguru, Madame NYIRARUGERO Dancille, abagize Inama y’Umutekano itaguye y’Intara y’Amajyaruguru  n'Intumwa ya UNICEF/Ishami ry’u Rwanda.

Mu ijambo rye,Minisitiri  Hon. GATABAZI Jean Marie Vianney  yashimye Ubuyobozi bw'Ikirombe cya GIFURWE ku bw'iri Rerero; asaba Ababyeyi b'Abana baharererwa kumufasha gushima Umukuru w'Igihugu, Nyakubahwa Paul  KAGAME kuri gahunda nyinshi zigamije guteza imbere Imibereho myiza y'Abanyarwanda harimo n'ishyirwaho ry’Ibigo Mbonezamikurire y’Abana Bato.

Yasabye Abaturage bitabiriye uyu Muhango kwitabira gahunda za Leta zirimo Ejo Heza, gutangira ku gihe Ubwisungane mu kwivuza (Mituweli), guteza imbere Isuku n’Isukura, kurwanya ikibazo cy’Abana bata n’Abasiba Ishuri no kurwanya Amakimbirane mu Miryango.

Ibindi Minisitiri wa Minisiteri y’Ubutegetsi bw’Igihugu yasabye Abakora muri iki Kirombe n’Abaturage bagituriye muri rusange harimo kurwanya Ibikorwa byo kwinjza Ibiyobyabwenge mu Karere, kubitunda, kubicuruza, kubinywa cyangwa  kubikoresha mu buryo bumwe cyangwa ubundi.

Abakozi  bafite Abana barererwa muri iki Kigo n’Abagituriye bashimye Umukuru w'Igihugu, Nyakubahwa Paul  KAGAME ku bwa gahunda nyinshi z’Iterambere zigamije guhindura Imibereho y’Abaturage ikarushaho kuba myiza; bizeza Abashyitsi  bitabiriye uyu Muhango ko bazakurikiza Inama bagiriwe; kandi ko bazubahiriza gahunda za Leta.