Uyu munsi, mu cyumba cy'inama cy'Akarere habereye inama nyunguranabitekerezo ku ngamba zo kongera umubare w'abatanga imisoro n'amahoro mu Karere ka Burera. 

Inama yayobowe n’Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste.

Yitabiriwe n'Umunyamabanga Nshingwabikorwa w'Akarere, Karangwa James, Umuyobozi w'imirimo rusange mu Karere, Abayobozi b'Amashami, Abanyamabanga Nshingwabikorwa b'Imirenge, abakozi b'Akarere bakorera ku rwego rw'Akarere, Abanyamabanga Nshingwabikorwa b'Utugari, abakozi b'Akarere bakorera ku rwego rw'Imirenge bashinzwe gukusanya imisoro n'amahoro, Abayobozi ba DASSO ku rwego rw'Akarere, Abahuzabikorwa ba DASSO ku rwego rw'Imirenge n'abahagarariye NGALI ku rwego rw'Akarere. 

Abayitabiriye basuzumye uko ibyemezo byafashwe n'Inama Njyanama y'Akarere byerekeye imisoro n'amahoro mu mwaka w'ingengo y'imari wa 2025-2026 bishyirwa mu bikorwa, uko Akarere ka Burera gahagaze mu gukusanya imisoro n'amahoro; bafata kandi ingamba zigamije kugira ngo Akarere kazagere ku ntego mu byerekeye gukusanya imisoro n'amahoro.

Mu ijambo rye, Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste yabwiye abitabiriye inama ati:"Twese tuzi ko amafaranga ava mu misoro akoreshwa mu kubaka ibikorwaremezo n’ibikorwa by’iterambere birimo imihanda, amashuri, amashanyarazi, kugeza amazi meza ku baturage, ibitaro ndetse n’amavuriro. Dufatanye kugira ngo abantu bose bakora ibikorwa by’ubucuruzi binyuranye basore’ kandi basore neza; bityo twongere umubare w’abasora; duteze imbere Igihugu cyacu."

Yabasabye kandi gufatanya kurwanya magendu; abibutsa ko umuntu ukora magendu aba atatanze umusoro; bikaba biri mu bidindiza iterambere ry’Igihugu muri rusange.