Guhera ku wa kane tariki 06 z’uku Kwezi, Abaturage 4,611 bo mu Mirenge ikora ku Mupaka mu Karere ka Burera bahawe akazi hagamijwe gukemura mu buryo burambye ibibangamiye iterambere ryabo. Imirimo bakora harimo gutunganya Umuhanda Nyamicucu-Gashanje-Kabere ureshya na Kilometero 13. Ku munsi Umuturage akorera 2,000 FRWs. Bahembwa hasize Iminsi itanu.

Ku wa gatandatu tariki 08 z’uku Kwezi, Minisitiri w’Ubutegetsi bw’Igihugu, Hon. Min. Gatabazi Jean Marie Vianney yatangije ku mugaragaro iyo gahunda yo guha Abaturage akazi; icyo gikorwa cyabereye mu Kagari ka Gashanje, ho mu Murenge wa Kivuye; ukaba ari umwe mu Mirenge ikora ku Mupaka.

Igikorwa cyo gutangiza ku mugaragaro iyo gahunda kitabiriwe n’Abayobozi batandukanye barimo, Umunyamabanga Uhoraho muri Minisiteri y’Ubutegetsi bw’Igihugu, Nyakubahwa Dusengiyumva Samuel, Guverineri w’Intara y’Amajyaruguru, Madame Nyirarugero Dancille n’Umuyobozi wa Polisi mu Ntara y’Amajyaruguru, Assistant Commissioner of Police (ACP) Reverien Rugwizangoga.

Mu butumwa Hon. Min Gatabazi JMV yagejeje ku Baturage nyuma yo kwifatanya na bo mu gikorwa cyo gutunganya Umuhanda mu Kagari ka Gashanje, yababwiye ko gahunda yo kubaha akazi igamije kubateza imbere kugira ngo bagire imibereho myiza, ikaba kandi igamije guteza imbere agace batuyemo; ariko na none ko biri muri gahunda z’iterambere ry’Igihugu muri rusange; kandi ko bireba n’Uturere twa Nyagatare, Gicumbi na Musanze.

Hon. Min. Gatabazi yabwiye Abaturage bari aho ati:" Gahunda nk’iyi, ndetse n’izindi nyinshi zishyirwaho hagamijwe guteza imbere imibereho y’Abaturage.Ibyo bigaragaza ko Igihugu kibakunda; kandi by’umwihariko bigaragaza ko Perezida wa Repubulika, Nyakubahwa Paul Kagame abakunda. Ubwo Ubuyobozi Bukuru bw’Igihugu bukomeje gushyiraho gahunda zigamije guteza imbere Umuturage; ndagira ngo mbasabye ibi bikurikira:Mwirinde Magendu, Mwirinde Uburembetsi; ndavuga kwishora mu Biyobyabwenge, mwibuke ko Imipaka ifunze; bityo mwirinde kwambuka mugira aho mujya; muri make mwirinde ikintu cyose cyahungabanya Umutekano n’Iterambere ry’Umuturage n’Igihugu muri rusange."

Yakomeje agira ati:"Ko Igihugu cyubatse kikanabegereza Ibikorwaremezo birimo Amashanyarazi, Ibigo Nderabuzima,Amashuri, Imihanda, Amazi meza; ibyo mwajyaga gushaka ahandi bikaba bisigaye bikorerwa mu Rwanda; mwambuka Umupaka mujya gushaka yo iki?Mureke Kanyanga kubera ko; mbere na mbere ntiyemewe mu Rwanda, itera abayinywa gukora ibinyuranyije n’Amategeko birimo gukubita no gukomeretsa, Ubujura, Ihohotera ry’uburyo butandukanye; ituma Abana bareka ishuri, Urubyiruko rukaba Ibirara; itera kandi Uburwayi butandukanye, n’ibindi bibi ntarondoye. Reka nongere mbivuge,ntituzihanganira na rimwe abinjiza Kanyanga mu Gihugu, abayitunda, abayicuruza n’abayinywa. Byumvikane neza,Ntituzabyihanganira."

Avuga kuri Magendu, Hon. Min. Gatabazi yagize ati:"Magendu idindiza Iterambere ry’Igihugu n’abagituye. Ko ibyo mwajyaga gushaka ahandi bisigaye bikorerwa mu Rwanda; ndetse hakaba harashyizweho gahunda yo kubibegereza aho mutuye mutiriwe mujya kubishaka kure, Magendu muyikorera iki?Muhindure Imyumvire n’Imitekerereze ku bijyanye na Magendu; mukunde, kandi mukoreshe ibikorerwa mu Rwanda."

Yasabye abahawe akazi gukoresha neza Amafaranga bazahembwa, bazigama, bayashora mu bibateza imbere aho kuyasesagura; abagira inama agira ati: "Abantu benshi bakize baba barahereye ku Mafaranga make cyane; nkanswe mwebwe muzajya muhembwa 2,000 FRWs ku munsi. Ayo Mafaranga akwiriye kubabera umusingi w’Iterambere rirambye; kandi iyo Umuturage ateye imbere, Igihugu na cyo gitera imbere."

Mu ijambo rye, Umuyobozi w’Akarere ka Burera, Mme Uwanyirigira M. Chantal yabanje gushima Umukuru w’Igihugu, Nyakubahwa Paul KAGAME ku bwa gahunda nyinshi zigamije guteza imbere Abaturage; harimo n’iyo yo guha akazi Abaturage batuye mu Mirenge ikora ku Mupaka. Yashimye kandi Minisitiri w’Ubutegetsi bw’Igihugu ku gutangiza ku mugaragaro iyo gahunda yo guha akazi Abaturage 4,611, ndetse n’abandi Bayobozi mu Nzego zitandukanye bifatanyije n’Akarere ka Burera muri icyo gikorwa.

Umuyobozi w’Akarere ka Burera, Mme Uwanyirigira yasabye Abaturage gukurikiza inama bagiriwe n’Abayobozi bafashe ijambo; mu byo yabasabye harimo guca ukubiri na Magendu, Ibiyobyabwenge no kwambuka Umupaka; agaragaza ko nta mpamvu n’imwe ituma bambuka Umupaka kubera ko ibyo bavanaga ahandi mu Rwanda bihari, binahakorerwa; abakangurira kubikunda no kubikoresha.

Abaturage bagaragaje ibyishimo byinshi by’uko bahawe akazi. Nyiraneza Consolée ni umwe muri bo. Yavuze ko yari Umurembetsi arabireka. Yatanze ubuhamya b’ingaruka zo kwishora mu Biyobyabwenge agira ati:"Ayo nashoye muri Kanyanga iyo nza kuyashora mu bindi byubahirije Amategeko ubu mba nteye imbere. Nahuye n’ibihombo byinshi bitewe n’uko inshuro nyinshi nahuraga n’abashinzwe umutekano nkayikubita hasi nkiruka. Nyuma naje kubona ko nta ho ngana mfata umwanzuro wo kubireka; none nahawe akazi kampemba 2,000 FRWs ku munsi.Mbeshye navuga ngo aya Mafaranga nigeze kuyakorera nkiri Umurembetsi."

Yagize kandi ati:"Ibibi by’Uburembetsi harimo kurara amajoro wambuka ujya gushaka Kanyanga, no kuba isaha iyo ari yo yose wafatwa ugafungwa; ibyo bijyana n’izindi ngaruka ntarondoye. Baturage bagenzi banjye, ndabagira inama yo kwirinda Kanyanga na Magendu. Mubireke, rwose mubigendere kure. Mboneyeho umwanya wo gushimira Ubuyobozi bwiza bw’Igihugu cyacu bwampaye akazi butitaye ku kuba narigeze gukora ibinyuranyije n’Amategeko; ndavuga Uburembetsi."

Undi wavuze ko yaretse Uburembetsi ni uwitwa Gakuru Jean Baptise watanze ubuhamya agira ati:"Mwa Baturage mwe, mwa Bavandimwe mwe muteraniye aha; ndangira ngo mbabwire ko nta cyiza cy’Ibiyobyabwenge. Ibyo mvuga mubihe agaciro kuko ndi Umuhamya wabyo; kandi nkaba nzi, ndetse nagezweho n’ingaruka mbi zo kwishora mu Biyobyabwenge. Ubu mundeba Ibiyobyabwenge byarankenesheje, byamazeho ibintu.

Gakuru yakomeje ubuhamya bwe agira ati: Ibiyobyabwenge byanteye ibihombo byinshi kugera n’aho ngurisha isambu y’Umuryango, nsigara ndi…., sinzi nanjye uko nakwiyita. Abishora n’abafite umugambi yo kwishora mu Biyobyabwenge ndabagira inama yo kuberaka; keretse niba hari ushaka kumera nka njye; ariko ndakeka nta we. Ndashima Ubuyobozi Bukuru bw’Igihugu cyacu, ndavuga Nyakubahwa Perezida Paul Kagame ku by’iyi gahunda yo gutanga akazi ku Baturage kageze no ku wari Umurembetsi; ari we njyewe. Narabiretse; sinzabisubiramo, ndanakangurira abandi kubyirinda no kubireka."

Nyamijumbi Béatrice na we ari mu bahawe akazi. Yagize ati:"Mvuze ko ngiye gutandukana no guhingira abandi sinaba mbeshye. Ibi ndabishingira ku Mafaranga Ibihumbi bibiri (2,000 FRWs) nandikiwe ku munsi. Yakube ku Kwezi wumve uko azaba angana. Ni bwo bwa mbere ngiye kubona Amafaranga angana atyo ku munsi. Aya mbere nzahembwa nzayaguramo Intama. Uko nzajya mpembwa nzajya ngira ayo nzigama ku ruhande nzayakoreshe Umushinga ufatika werekeranye n’Ubuhinzi n’Ubworozi."