Kimwe n'ahandi mu Gihugu; kuri uyu wa gatanu tariki 17 Ukuboza, mu Karere ka Burera hasojwe Ukwezi kwahariwe ibikorwa bya Polisi (Police Month 2022) kwaranzwe n’ibikorwa bitandukanye bigira uruhare mu guteza imbere imiberehe y’Abaturage n’Igihugu muri rusange.

Ku rwego rw'Akarere; uyu muhango wabereye mu Kagari ka Kaganda,Umurenge wa Kinyababa; aho Umuyobozi w'Akarere, Mme UWANYIRIGIRA Marie Chantal; ari hamwe n'Umuyobozi w'Ingabo mu Karere, Lt Col. Sam.  MWESIGYE n’Umuyobozi wa Polisi mu Karere, SP Aphrodis NKUNDINEZA bashyikirije BAZUBAFITE Laurence Inzu yubakiwe muri Police Month; akaba yarabaga mu Nzu ishaje.

Ibindi byakozwe muri Police Month mu Karere ka Burera harimo Inzu yubakiwe SEMANA Damien, mu Kagari ka Kidakama,Umurenge wa Gahunga n'Imiryango 308 yahawe amashamyarazi akomoka ku mirasire y'Izuba.

Hari kandi Irerero ry'Abana bato (ECD) ryubatswe mu Kagari ka Rushara,Umurenge wa Nemba; aho Umuyobozi w’Akarere wungirije ushinzwe imibereho myiza y’Abaturage, Bwana MWANANGU Theophile, ari hamwe n'Ubuyobozi bw'Umurenge n'Abayobozi b'Inzego zitandukanye muri uyu Murenge zirimo Polisi n'Ingabo yamurikiye ku mugaragaro Abaturage iri Rerero bubakiwe.

Mu butumwa Abaturage bagejejweho mu muhango wo gusoza Ukwezi kwahariwe ibikorwa bya Polisi mu Karere ka Burera; bakanguriwe kwirinda ibikorwa byo kwishora mu Biyobyabwenge, kwirinda amakimbirane, kwirinda ubusinzi; basabwa kubungabunga no gusigasira ibyagezweho birimo ibikorwa by’iterambere bitandukanye, kugira umuco w'isuku no kurwanya imirire mibi n'igwingira bategura indyo yuzuye.

Mu butumwa yagejeje ku Baturage b'Umurenge wa Kinyababa, Umuyobozi w'Akarere, Mme UWANYIRIGIRA Marie Chantal yagize ati:" Ibikorwa byubatswe mu Kwezi kwahariwe ibikorwa bya Polisi (Police Month) mu Karere ka Burera; byamurikiwe Abaturage bijyanye na gahunda z'iterambere z'Umukuru w'Igihugu Nyakubahwa, Paul KAGAME zigamije guteza imbere Abaturage n'Igihugu muri rusange. Mumfashe kumushimira. Dukwiriye rero kubungabunga no kubyaza umusaruro ibikorwa by'iterambere Igihugu kimaze kugeraho. "

Nyuma yo gushyikirizwa inzu yubakiwe mu Kwezi kwahariwe ibikorwa bya Polisi ( Police Month); BAZUBAFITE Laurence yagize ati:"Ndashima Umukuru w'Igihugu Nyakubahwa, Paul KAGAME ku bw'iyi Nzu nziza ijyanye n'icyerekezo cy'iterambere u Rwanda rurimo. Arakarama."

SEMANA Damien yagize ati:"Kuba uyu munsi nshikirijwe iyi nzu nziza nubakiwe mu Kwezi kwahariwe ibikorwa bya Polisi; bikomoka ku miyoborere myiza na gahunda nziza z'iterambere z'Umukuru w'Igihugu, Nyakubahwa Paul KAGAME zigamije guteza imbere Abaturage . Ndamushimiye."