Ku gicamunsi cy’uyu wa gatatu tariki 25 Gashyantare 2026, Umuyobozi w'Akarere, Mukamana Soline, yakiriye Guverineri w'Intara y'Amajyaruguru, Mugabowagahunde Maurice wasuye abaturage b'Akagari ka Gatare, mu Murenge wa Ruhunde muri gahunda y’ubukangurambaga ku gutanga umusanzu wa Mituweli ya 2026-2027, abamenyesha, anabasobanurira impinduka zabaye muri iyi gahunda n’icyo zigamije.

Yababwiye ko izo mpinduka ziteganywa n’Iteka rya Minisitiri w’Intebe n° 001/03 ryo ku wa 16/02/2026 ryerekeye inkunga zitangwa mu bwisungane mu kwivuza, kandi ko rigena abatanga inkunga mu bwisungane mu kwivuza, ingano y’inkunga batanga n’uburyo zitangwamo.

Yababwiye ko ingano y’umusanzu utangwa n’umunyamuryango mu bwisungane mu kwivuza igenwa hakurikijwe urwego rw’iyandikisha muri IMIBEREHO Dynamic Social Registry.

Yagize ati:Umunyamuryango wanditswe mu rwego rwa mbere atanga umusanzu wa 4,000 Frw kuri buri muntu ku mwaka, kandi aya mafaranga yishyurwa na Leta.Umunyamuryango wanditswe mu rwego rwa kabiri atanga umusanzu wa 3,000 Frw kuri buri muntu ku mwaka, hiyongereyeho 1,000 Frw yishyurwa na Leta."

Yababwiye kandi ko  umunyamuryango wanditswe mu rwego rwa gatatu atanga umusanzu wa 5.000 Frw kuri buri muntu ku mwaka; umunyamuryango wanditswe mu rwego rwa kane atanga umusanzu wa 8,000 Frw kuri buri muntu ku mwaka; naho umunyamuryango wanditswe mu rwego rwa gatanu atanga umusanzu wa 20,000 Frw kuri buri muntu ku mwaka.

Yababwiye na none ko umunyamuryango mu bwisungane mu kwivuza yishyura inyunganirabwishyu igihe cyose ahawe ubuvuzi, ingano y’inyunganirabwishyu ku rwego rw’ikigo nderabuzima n’urw’ivuriro ry’ibanze ikaba ari 200 Frw na 10% y’ikiguzi cy’ubuvuzi ku rwego rw’ibitaro; kandi ko abatishoboye badatanga inyunganirabwishyu, abakangurira gutangira gutanga umusanzu wa Mituweli.

Yababwiye ko abatanga inkunga mu bwisungane mu kwivuza ari Leta, abakozi bo mu nzego za Leta n’abo mu rwego rw’abikorera, ibigo bitanga serivisi z’ubwishingizi bwo kwivuza, amasosiyete y’itumanaho, amasosiyete acuruza lisansi na mazutu, ibigo bitanga serivisi z’ubwishingizi rusange n’ibigo bitanga serivisi za banki.

Muri icyo kiganiro, Guverineri Mugabowagahunde yasabye kandi abatuye Akarere ka Burera kwitegura neza igihembwe cy'Ihinga cya 2026B, kuri site z'ubuhinzi bakahahinga gusa ibihingwa bumvikanye, bakitabira n'izindi gahunda zirimo inteko z'abaturage n'umuganda.

Gutangiza ubukangurambaga bwa Mituweli ya 2026/2027 byahuriranye na gahunda yo gusura abatuye ako Kagali muri gahunda ya DUHARI KU BWANYU, aho Umuyobozi w'Akarere yashimye Guverineri ku butumwa yagejeje ku batuye ako Kagali, abakangurira kurangwa n'isuku, kwirinda ibinyobwa bitujuje ubuziranenge n'ibiyobyabwenge by'ubwoko bwose