Guverineri w’Intara y’Amajyaruguru, Mme NYIRARUGERO Dancille yasabye abatuye Akarere ka Burera barangwa no guhishira abinjiza Kanyanga n’ibindi Biyobyabwenge mu Gihugu, ababitunda, ababicuruza, ababinywa n’ababikoresha mu buryo bumwe cyangwa ubundi kubicikaho. Ubu butumwa yabutangiye mu Nama y’Umutekano itaguye y’Akarere ka Burera yateranye kuri uyu wa Kabiri Tariki 03 Kanama uyu Mwaka yigaga ku ngamba zo kurwanya Ibiyobyabwenge; ikaba yarabereye mu Kagari ka Rusumo, mu Murenge wa Butaro.

 Abashyitsi bitabiriye iyi Nama harimo Perezida wa Komisiyo y’Igihugu y’Ubumwe n’Ubwiyunge, Bishop John  RUCYAHANA, Umuyobozi wa Polisi mu Ntara y’Amajyaruguru, ACP Réverien RUGWIZANGOGA, Umuyobozi w’Inkeragutabara (Reserve Force) mu Karere ka Burera, Lt Col. Fidele MINEGA, n’Umuyobozi w’Urwego rw’Igihugu rw’Ubugenzacyaha (RIB) mu Ntara y’Amajyaruguru, Béline MUKAMANA .

Inama yatumiwemo initabirwa n’abagize Inama y’Umutekano itaguye y’Akarere ka Burera, Abanyamabanga Nshingwabikorwa b’Imirenge ya Butaro na Kivuye n’Abayobozi b’Imidugudu igize iyi Mirenge, Abikorera, Abayobozi b’Amadini n’Amatorero, Urubyiruko rw’Abakorerabushake, Abavuga rikumvikana  n’abahagarariye Abajyanama b’Ubuzima.

Mu ijambo ry’ikaze, Umuyobozi w’Akarere ka Burera, Mme UWANYIRIGIRA Marie Chantal yagaragaje ko ibyiciro by’Abantu  batandukanye bakomeje gufatirwa mu bikorwa byo kwishora mu Biyobyabwenge; kandi ko bigira ingaruka ku babyishoramo, Imiryango yabo n’Umuryango Nyarwanda muri rusange."

Yagize ati:"Bamwe mu batunda Kanyanga n’ibindi Biyobyabwenge barwanya Inzego z’Umutekano ku buryo hari ababiburiramo Ubuzima. Iyo hagize abiburiramo ubuzima Igihugu kiba kibuze Amaboko yakabaye afatanya n’Abandi kucyubaka.

Umuyobozi w’Akarere yasabye Abayobozi b’Inzego zitandukanye bitabiriye Inama barimo Abayobozi b’Imidugudu gushyira imbagara mu kurwanya no guca Uturari dukorera mu Ngo hagamijwe kurushaho gukumira no kurwanya Icyorezo cya COVID-19.

Mu butumwa bwe, Guverineri, Mme NYIRARUGERO Dancille yagaragaje ko kuba hari Imidugugudu yiganjemo  Ibiyobyabwenge biterwa ahanini no kutuzuza Inshingano ku Muyobozi  wawo; ndetse no kuba hari abakingira ikibaba ababyishoramo bitewe n’Isano bafitanye ndetse n’ibindi biitandukanye.

Yagize ati:"Abatunda, Abacuruza, abanywa n’abakoresha Ibiyobyabwenge batuye mu Masibo. Igihe kirageze; ndetse igihe ni iki kugira ngo Abayobozi batuzuza Inshingano zabo kugera n’aho aho bayobora haba indiri y’Ibiyobyabwenge cyagwa inzira bicishamo bijyanwa ahandi babibazwa. Abayobozi bagomba guhagarara mu nshingano zabo bakarwanya Ibiyobyabwenge bivuye inyuma."

Yakomeje agira ati:"Dufatanyije tuzatsinda Urugamba two kurwanya Ibiyobyabwenge. Reka buri wese; aha ndavuga Abayobozi ndetse n’Abaturage abigire ibye; turinde Urubyiruko rw'u Rwanda Ibiyobyabwenge, tuzirikana ko ari rwo Maboko yarwo."

Yagize na none ati:"Dufatanyije tuzatsinda Urugamba two kurwanya Ibiyobyabwenge. Reka buri wese; aha ndavuga Abayobozi ndetse n’Abaturage abigire ibye; turinde Urubyiruko rw'u Rwanda Ibiyobyabwenge, tuzirikana ko ari rwo Maboko yarwo."

Guverineri, Mme NYIRARUGERO Dancille yasabye Abayobozi  bitabiriye inama gukangurira Abaturage kwirinda guhishira abatunda, abacuruza n’abanywa Kanyanga n’Ibindi Biyobyabwenge; kabone  n’aho ubikora yaba ari Umuvandimwe, Inshuti, cyangwa Umuturanyi; ikindi kandi Inzego zikarushaho gufatanya kubirwanya.

Mu kiganiro yahaye abitabiriye Inama, Bishop John RUCYAHANA  yagize ati: Kurwanya Ibiyobyabwenge bigomba gushingira ku Muryango. Abana  bitezweho kuba Abaganga, Abarezi n’Abayobozi mu zindi Nzego zitandukanye z’Igihugu bari gushorwa mu Biyobyabwenge. Ababibashoramo barica ahazaza habo; kandi barahemukira Igihugu."

Yasabye Abayobozi mu Nzego zitandukanye gufatanya kurwanya Ibiyobyabwenge aho biva bikagera agira ati:"Mureke turerere u Rwanda ruzira Ibiyobyabwenge.Niba Umuturanyi wawe anywa cyangwa acuruza Kanyaga cyangwa ibindi Biyobyabwenge; mugire Inama yo kubireka. Nubirenza Amaso wibwira ko ibyo akora nta cyo bigutwaye; uzaba wibeshya.Niba nta cyo ukoze ngo abicikeho; menya ko Ingaruka zabyo zizakugeraho byanze bikunze. Bayobozi muri aha; muhaguruke turwanye Ibiyobyabwenge, tubirinde Urubyiruko; bityo dutegure Abanyarwanda bazima bazigirira akamaro; bakanakagirira Igihugu."

ACP R. RUGWIZANGOGA yasabye Abayobozi bitabiriye Inama kwirinda gukingira ikibaba abishora mu Biyobyabwenge, Magendu n’ibindi bikorwa bitemewe n’Amategeko. Yabasabye kandi kurushaho kugenzura  ko Amabwiriza yo gukumira no kurwanya Icyorezo cya COVID-19 yubahirizwa.

Ubwo yafataga ijambo, Béline MUKAMANA yagaragaje ko ibyaha birimo gukubita , gukomeretsa no gusambanya Abana bikorwa ahanini n’abanyoye Ibiyobyabwenge; asaba Abayobozi bitabiriye Inama kongera imbaraga mu gukangurira Abaturage kubyirinda no kubirwanya batanga Amakuru y’ukuri yerekeranye n’ababyishoramo.

Yasabye Ababyeyi gusubira ku nshingano zabo zo kurerera u Rwanda neza; bigisha Urubyiruko ububi n’ingaruka zo kwishora mu Biyobyabwenge, babatoza kubyirinda."