Kuri uyu wa kabiri tariki 18 z’uku Kwezi, Umuyobozi w'Akarere, Mme UWANYIRIGIRA Marie  Chantal; ari hamwe n'abagize inama y'umutekano itaguye y’Akarere yakiriye mu Murenge wa Kagogo Guverineri w'Intara y'Amajyaruguru, Mme NYIRARUGERO Dancille wagasuye ari hamwe n'Umuyobozi w’Ikigo cy’Igihugu gishinzwe guteza imbere Tekiniki, Imyuga n’Ubumenyi ngiro ( Rwanda TVET BOARD), Eng. Paul UMUKUNZI n’Umuyobozi wa Polisi mu Ntara y’Amajyaruguru, Chief Superintendent of Police (CSP) Francis MUHETO aho yatangije ku mugaragaro icyumweru cyahariwe ubukangurambaga ku burezi ku rwego ry'iyi Ntara. Umuhango wo kugitangiza wabereye ku Ishuri ryisumbuye rya KAGOGO, mu Murenge wa Kagogo aho bagiranye ibiganiro n'Abanyeshuri n’Abarezi babo.

Ibiganiro bagiranye n’Abanyeshuri byibanze ku kubakangurira kurangwa n'imyitwarire myiza;,kwita ku masomo, gufata neza ibikoresho n'inyubako by'Ishuri, kwirinda Ibiyobyabwenge; kwirinda guta cyangwa gusiba Ishuri.

Mu butumwa yagejeje ku Banyeshuri, Guverineri, Mme NYIRARUGERO Dancille yababwiye ati:"Nk’uko byitwa; Ibiyobyabwenge biyobya Ubwenge. Umunyeshuri ubinywa ntashobora gutsinda mu Ishuri; kandi aba ashyira ubuzima bwe n’ahazaza he mu kaga. Mwirinde Ibiyobyabwenge aho biva bikagera; kandi mugire bagenzi banyu babyishoramo inama yo kubireka mubereka ingaruka zo kubyinjiza mu gihugu, kubitunda, kubikwirakwiza, kubicuruza, kubinywa no kubikoresha mu buryo bumwe cyangwa ubundi."

Ku gicamunsi, Guverineri w'Intara y'Amajyaruguru yifatanyije n'Abaturage mu nteko y’Abaturage yabereye mu Kagari ka Kaganda,Umurenge wa Kinyababa; naho Umuyobozi wa Rwanda TVET BOARD yifatanyije n'Abaturage mu nteko yabereye mu Kagari ka Nyamabuye, Umurenge wa Kagogo.

Mu butumwa Guverineri, Mme NYIRARUGERO Dancille n’Umuyobozi wa Rwanda TVET BOARD, Eng. Paul UMUKUNZI bagejeje ku Baturage; babasabye kwirinda kuvana Abana mu Ishuri cyangwa kuribasibya; kugira isuku umuco, kurwanya isuri mu Mirima yabo, kubahiriza Amabwiriza agamije gukumira Ebola,kwirinda ibikorwa byo kwishora mu Biyobyabwenge na Magendu; bakanitabira gahinda zirimo Ejo Heza.

Mu masaha y'umugoroba, Umuyobozi wa Rwanda TVET BOARD yasuye TVET ya Cyanika, ibarizwa mu Murenge wa Cyanika aho yarebaga aho imirimo yo kwagura inyubako z'iri Shuri igeze