Kuri uyu wa kabiri, tariki 08 Ugushyingo; Guverineri w’Intara y’Amajyaruguru, NYIRARUGERO Dancille; ari hamwe n’Umuyobozi w’Inkeragutabara mu Ntara y’Amajyaruguru, Maj. Gen. Eric MUROKORE, Umuyobozi wa Polisi muri iyi Ntara, Chief Superintendent of Police (CSP) Francis MUHETO n’Abayobozi b’Inzego zitandukanye mu Karere ka Burera bifatanyije n'Abaturage mu muganda wo gutera ifumbire ya DAP na UREA mu mirima yabo y'Ibigori mu Gishanga cya Kamiranzovu, mu Murenge wa Butaro, Akarere ka Burera. Iyi fumbire igenewe guterwa mu mirima y’Ibigori n’Ibishyimbo y’Abaturage; bakaba barayihawe ku buntu mu rwego rwo kubunganira; hagamijwe kongera umusaruro w’ibi bihingwa.

Uyu muganda witabiriwe kandi n’Umuyobozi w'Ishami ry'Ikoranabuhanga n'Ubushakashatsi mu Kigo cy'Igihugu gishinzwe guteza imbere Ubuhinzi (RAB), IZAMUHAYE Jean Claude.

Ubwo Abashyitsi bageraga mu Karere bakiriwe; banahabwa ikaze n’Umuyobozi wako, UWANYIRIGIRA Marie Chantal; wari hamwe n’abagize inama y’umutekano itaguye y’Akarere

Mu butumwa Guverineri w’Intara y’Amajyaruguru, NYIRARUGERO Dancille yagejeje ku Baturage nyuma y'umuganda yabasabye kwifatanya na we gushima Umukuru w’Igihugu, Nyakubahwa Paul KAGAME ku bwa gahunda nyinshi zigamije guteza imbere imibereho y’Abaturage n’iterambere ry’Igihugu muri rusange.

Yabasabye kurwanya isuri mu mirima yabo bacukuramo amaterasi, kuzirika ibisenge by'Amazu yabo no gucukura ibyobo bifata amazi no gutera neza ifumbire bahawe, kuzafata neza umusaruro; birinda kutsa imyaka; kandi bagahinga ubutaka bwose hagamijwe kongera umusaruro.

Guverineri NYIRARUGERO yabwiye kandi Abaturage bitabiriye umuganda ati:" Murasabwa kwita ku myaka yanyu kugira ngo hazaboneke umusaruro mwinsi; kandi mwiza; bityo mwihaze mu biribwa; ndetse musagurure amasoko."

Mu butumwa Maj. Gen. MUROKORE na CSP MUHETO bagejeje ku Baturage babasobanuriye ingaruka zo kwishora mu bikorwa byo kwinjiza Kanyanga n’ibindi Biyobyabwenge mu Gihugu, kubicuruza, kubinywa, kubikwirakwiza no kubikoresha mu buryo bumwe cyangwa ubundi; babasaba kubyirinda no kugira inama abababikora kubireka.

Umwe mu Baturage bahawe; bakanatererwa ifumbire mu murima yabo witwa HARERIMANA Emmanuel yagize ati:"Ifumbire mpawe; ikaba ndetse inatewe mu murima wanjye n’Abayobozi bafatanyije n’Abaturage izatuma ngira umusaruro mwinshi w’Ibigori kandi mwiza. Ntibyari byoroshye kubona amafaranga yo kuyigura; none ndayibonye ; tukaba tuyikesha gahunda nziza z’Umukuru w’Igihugu, Nyakubahwa Paul KAGAME zigamije kurushaho guteza imbere imibereho y’Umuturage n’Igihugu muri rusange. Iyi nkunga ijyanye n’imvugo: UMUTURAGE KU ISONGA."