Kuri uyu wa Gatanu, Tariki 10/12/2021, ku Bitaro bya Butaro biherereye mu Murenge wa Butaro, Akarere ka Burera habereye Umuhango wo gutangiza ku mugaragaro Imirimo yo kwagura Ibitaro bya Butaro bikajya ku rwego rw’Ibitaro bya Kaminuza (Teaching Hospital).

Biteganyijwe ko Icyiciro cya Mbere cy'Inyubako kizarangira mu Ukwakira 2022 gitware Miliyari 6 Frw; Umushinga wose wo kwagura ibi Bitaro ukaba uzarangira mu Mwaka wa 2025 utwaye Miliyari 14 z’Amafaranga y’u Rwanda.

Umushyitsi Mukuru muri uyu Muhango yari Guverineri w’Intara y’Amajyaruguru, Mme NYIRARUGERO Dancille. Abandi Bashyitsi bawitabiriye harimo Umuyobozi wa University of Global Health Equity (UGHE), Prof. Paul Farmer n’Umuyobozi wungirije wa UGHE, Prof. Agnes BINAGWAHO. Abagize Komite Nyobozi y'Akarere ka Burera , ni ukuvuga Umuyobozi wako, Mme UWANYIRIGIRA Marie Chantal n'Abayobozi b'Akarere bungirije, Bwana NSHIMYIMANA Jean Baptiste; akaba ashinzwe Iterambere ry’Ubukungu na Bwana MWANANGU Théophile ushinzwe Imibereho Myiza  bitabiriye uyu Muhango.

Nyuma yo gushyira Ibuye ry'ifatizo ahagiye kwagurirwa Ibitaro bya Butaro , Abashyitsi basuye Inyubako Ibitaro bisanzwe bikoreramo berekwa Serivisi zihatangirwa, banaganira n'Abarwayi.

Mu butumwa Guverineri, Mme NYIRARUGERO Dancille yagejeje ku bitabiriye uwo Muhango yagize ati:"Kwaguka kw’Ibitaro bya Butaro  ni intambwe ikomeye mu iterambere mu rwego rw'Ubuzima haba mu Karere ka Burera , Igihugu n'Akarere u  Rwanda ruherereyemo. Ndashima Umukuru w'Igihugu , Nyakubahwa Paul KAGAME ku  Iterambere amaze kugeza ku Gihugu; harimo n’iri ryo mu rwego rw'Ubuzima."

Mu ijambo rye, Umuyobozi w'Akarere, Mme UWANYIRIGIRA Marie Chantal yagize ati:" Mumfashe gushimira Umukuru w'Igihugu,Nyakubahwa Paul  KAGAME ku kutuzanira Abafatanyabikorwa barimo PARTHERS IN HEALTH (PIH) bagira uruhare mu guteza imbere Urwego rw'Ubuzima  n’Imibereho y’Abatuye Akarere muri rusange. "Umuyobozi w'Akarere yagaragaje kandi ko kwagura Ibitaro bya Butaro bizatuma Serivisi bitanga ziyongera; kandi zitangwe neza kurushaho; kandi ko bizatuma abiga muri UGHE babona aho bitoreza ibyo mu Ishuri.

Abandi barimo Prof. Paul Farmer, Prof. Agnes BINAGWAHO, Umuyobozi wa PIH, Dr Mubiligi Joel n’Umuyobozi w’Ibitaro bya Butaro, Maj. Dr Emmanuel  KAYITARE  bagarutse ku kamaro ko kwagura ibi Bitaro; bagaragaza ko bizateza imbere Urwego rw’Ubuzima muri rusange.