Kimwe n’ahandi mu Gihugu; kuri uyu wa gatandatu tariki 28 Mutarama uyu mwaka; mu Karere ka Burera bahaye Umuganda rusange usoza Ukwezi kwa 01/2023 waranzwe n'ibikorwa birimo kubakira imwe mu miryango itishoboye amazu, kurwanya isuri no gutunganya imihanda hakurwamo itaka ryatembeyemo,kuyiharura no gusibura imiyoboro y'amazi iri ku mpande yayo.

Umuyobozi w’Akarere, UWANYIRIGIRA Marie Chantal ,ari hamwe n’abagize inama y'umutekano itaguye y'Akarere na Visi Perezida w'Inama Njyanama y'Akarere, UWAMWIZA Catherine na bamwe mu bagize inama Njyanama y’Akarere bakiriye mu Murenge wa Kinyababa Honorable Senateri HABINEZA Faustin   aho bifatanyije n'Abaturage kubakira SEBIKARI Michel inzu mu Kagari ka Musasa; naho Umuyobozi w'Akarere wungirije ushinzwe imibereho myiza y'Abaturage, MWANANGU Theophile ; hamwe na Honorable Depite UWINGABE Solange bifatanyije n'Abaturage gutunganya umuganda mu Kagari ka Kamanyana, mu  Murenge wa Cyanika.

Umuyobozi w'Akarere wungirije ushinzwe iterambere ry'Ubukungu, NSHIMYIMANA Jean Baptiste ; ari hamwe n'izindi nzego bifatanyije n'Abaturage gutunganya umuhanda mu Kagari ka Ntaruka, mu Murenge wa Kinoni bawutsindagira.

Nyuma y'umuganda; habaye ibiganiro byatangiwemo ubutumwa ku gukangurira Abaturage kwitabira gahunda zirimo isuku n'isukura, ubwisungane bwa Ejo Heza, gutangira ku gihe Mituweli, kurwanya imirire mibi n'igwingira no kurwanya isuri.

Mu butumwa Honorable Senateri HABINEZA yagejeje ku Baturage b’Akagari ka Musasa nyuma y’umuganda yabakanguriye kuboneza urubyaro; kubahiriza amabwiriza yo kurwanya imirire mibi n’ugwingira; asaba Abagabo kugira uruhare mu kuboneza urubyaro.

Yagize ati:" Kuboneza urubyaro bigira uruhare mu iterambere ry'Umuryango n'Igihugu muri rusange. Kugira ngo iyi gahunda  igerweho; Abagabo bakwiriye kubigiramo uruhare rufatika. Umugore n'Umugabo bakwiriye kuganira; bakumvikana ku buryo buboneye bakoresha mu kuboneza urubyaro."

IGIHOZO Fabiola; utuye mu kagari ka Nyamabuye; Umurenge wa Kagogo ni umwe mu bubakiwe inzu mu muganda w’uyu munsi. Mu ijambo rye ry’ishimwe yagize ati:"Umuryango wanjye wabaga mu nzu itameze neza. Ndashima Ubuyobozi  bukuru bw’Igihugu cyacu kuba mu minsi ibarirwa ku ntoki nzaba ntuye mu nzu nziza nubakiwe biciye muri gahunda nziza y’Igihugu y’Umuganda. Ibi byiza; ndetse n’irindi terambere Abaturage tumaze kugeraho; ndetse n’iterambere Igihugu kimaze kugeraho turikesha imiyoborere myiza y’Umukuru w’Igihugu, Nyakubahwa Paul KAGAME. Ndamushimira cyane."

SEBIKARI Michel wubakiwe inzu mu Kagari ka Musasa, mu Murenge wa Kinyababa yashimye agira ati: "Twabaga mu nzu iva kubera amabati yayo yari ashaje. Nshimishijwe n’uko mu minsi mike umuryango wanjye uzaba utuye mu nzu nziza nubakiwe n’Akarere kacu ka Burera. Ndashima Ubuyobozi Bukuru bw’Igihugu cyacu kuri gahunda yo kubakira imiryango itishoboye amazu; ndetse  n’izindi gahunda zigamije guteza imbere imibereho y’Abaturage n’Igihugu muri rusange."