GUTANGIZA ICYUMWERU CY'ICYUNAMO CYO KWIBUKA

Kimwe n'ahandi mu Gihugu; uyu munsi tariki 07 Mata 2024, mu Midugudu igize Akarere ka Burera habereye igikorwa cyo kwibuka ku nshuro ya 30 Jenoside yakorewe Abatutsi mu Rwanda mu mwaka wa 1994 ku nsanganyamatsiko igira iti:" Kwibuka,Twiyubaka ".

Ku rwego rw'Akarere, igikorwa cyo gutangiza icyumweru cy'Icyunamo cyo kwibuka ku nshuro ya 30 Jenoside yakorewe Abatutsi mu 1994 no kwibuka mu minsi ijana cyabereye mu Murenge wa Rugarama ahabereye ibikorwa birimo gucana urumuri rw'icyizere ku Rwibutso rwa Jenoside yakorewe Abatutsi rw'Akarere ruri muri uyu Murenge, gufata umunota wo kwibuka no kunamira abazize Jenoside yakorewe Abatutsi bashyinguye muri uru Rwibutso no gushyira indabo kuri urwo Rwibutso mu rwego rwo kubaha icyubahiro.

Igikorwa cyo kwibuka ku nshuro ya 30 Jenoside yakorewe Abatutsi mu 1994 ku rwego rw’Akarere ka Burera cyitabiriwe na Perezidante w'Inama Njyanama y'Akarere, NYIRAMANA Christine, abagize Komite Nyobozi y'Akarere n'Abayobozi b'inzego zitandukanye barimo Umuyobozi wungirije wa 503 Bde , Col. Jean de la Croix BAZIRUWIHA, Umuyobozi wa Polisi mu Ntara y'Amajyaruguru, ACP Edmond KALISA, Umuyobozi w'Inkeragutabara mu Karere, Lt Col Fred NYIRINKWAYA, Umuyobozi wa Polisi mu Karere ka Burera, SSP Aphrodis NKUNDINEZA, Major Didace MUSONI n’Umuyobozi w’Urwego rw’Ubugenzacyaha mu Karere ka Burera, RWEMA Isaac.

Hari kandi Intumwa y'Intara y'Amajyaruguru, NKURUNZIZA Alphonse, Perezida wa AVEGA mu Karere, MUKANSIGAYE Marguerite, Visi Perezida wa IBUKA mu Karere, NSENGIYUMVA Sebastien, Abajyanama mu Nama Njyanama y'Akarere n'abakozi b'Akarere. Abashyitsi bitabiriye iki gikorwa bahawe ikaze n'Umuyobozi w'Akarere, MUKAMANA Soline.

Igikorwa cyo gutangiza  icyumweru cy'Icyunamo cyo kwibuka ku nshuro ya 30 Jenoside yakorewe Abatutsi mu 1994 no kwibuka mu minsi ijana mu Karere ka Burera cyaranzwe n'ibikorwa birimo gufata umunota wo kwibuka no kunamira abazize Jenoside yakorewe Abatutsi, ikiganiro cyagarutse ku insanganyamatsiko y'uyu mwaka, ubuhamya, ubutumwa bw'uhagarariye IBUKA mu Karere no gukurikira ijambo ry'Umushyitsi Mukuru, Perezida wa Repubulika, Nyakubahwa Paul KAGAME.

Ibiganiro byateguwe n’Ibigo bya Leta n’ibyigenga

Ibiganiro byatanzwe tariki 12 Mata uyu mwaka. Byahawe abakozi b’Akarere bakorera ku cyicaro cyako. Byabereye mu cyumba cy’inama cy’Akarere, biyoborwa n’Umuyobozi wako, Mukamana Soline, ari kumwe n’Umuyobozi w’Akarere wungirije ushinzwe imibereho myiza y’abaturage, MWANANGU Theophile. Kuri uyu munsi kandi; igikorwa cyo kwibuka Jenoside yakorewe Abatutsi cyabereye kandi mu Bitaro byigisha byo ku rwego rwa II bya Butaro, mu Murenge wa Butaro; cyitabirwa n’Umuyobozi w’Akarere, Mukamana Soline n’Umuyobozi wa Polisi mu Karere, Senior Superintendent of Police (SSP) Aphrodis Nkundineza.  Ibiganiro byabereye kandi muri Gifurwe Wolfram Mining; bihabwa abakozi b’iki Kirombe cyo mu Murenge wa Rugengabali. Byitabiriwe n’Umuyobozi w’Akarere wungirije ushinzwe iterambere ry’ubukungu, NSHIMYIMANA Jean Baptiste.

Tariki 24 Mata uyu mwaka, ibiganiro bijyanye kwibuka ku nshuro ya 30 Jenoside yakorewe Abatutsi mu 1994 no kwibuka mu minsi ijana mu Karere ka Burera byabereye muri University of Global Health Equity (UGHE), Ishami ryayo riri i Butaro. Byitabiriwe n’Umuyobozi w’Akarere wungirije ushinzwe iterambere ry’ubukungu, NSHIMYIMANA Jean Baptiste. Abanyeshuri biga muri iyi Kaminuza , abahigisha, abakozi bayo n'Ubuyobozi bwayo bahawe ikiganiro ku mateka ya Jenoside yakorewe Abatutsi mu Rwanda mu 1994 cyatanzwe n'Umuyobozi wa Komite Ngishwanama y’Inararibonye, Hon. Tito RUTAREMARA.

Abitabiriye ibiganiro byabereye ahavuzwe hejuru basabwe gusigasira Ubumwe n'Ubudaheranwa bw'Abanyarwanda; birinda, banagira uruhare mu kurwanya ingengabitekerezo ya Jenoside yakorewe Abatutsi mu 1994,ihakana ndetse n'ipfobya ryayo , gukomeza kwimakaza gahunda ya Ndi Umunyarwanda no gufata mu mugongo abarokotse Jenoside yakorewe Abatutsi mu 1994.

Kwibuka abazize Jenoside yakorewe Abatutsi bashyinguye mu Rwibutso ruri mu Murenge wa Rusarabuye

Kuri uyu wa gatanu tariki 26 Mata uyu mwaka, Umuyobozi w'Akarere, Mukamana Soline yakiriye Minisitiri w’umutekano, Gasana Alfred witabiriye igikorwa cyo kwibuka abazize Jenoside yakorewe Abatutsi mu 1994 bashyinguye mu Rwibutso rwa Jenoside yakorewe Abatutsi ruri mu Murenge wa Rusarabuye. Yakira Minisitiri w’umutekano, Umuyobozi w'Akarere yari kumwe n'abagize Komite Nyobozi y'Akarere n’Abayobozi b'Inzego z'umutekano mu Karere.

Iki gikorwa cyitabriwe na  Guverineri w’Intara y’Amajyaruguru, Mugabowagahunde Maurice, Hon. Senateri Habineza Faustin, Hon. Seanateri Mureshyankwano Marie Rose, Abayobozi b'Inzego z'umutekano mu Ntara y'Amajyaruguru na bamwe mu bafite abavandimwe bazize Jenoside yakorewe Abatutsi.

Mu byaranze iki gikorwa harimo urugendo rwo kwibuka abazize Jenoside yakorewe Abatutsi mu 1994 harimo abashyinguye muri uru Rwibutso, gushyira indabo ku Imva bashyinguyemo no gufata umunota wo kubibuka mu rwego rwo kubaha icyubahiro.

Minisitiri Gasana yasabye abitabiriye igikorwa cyo kwibuka abazize Jenoside yakorewe Abatutsi mu 1994 bashyinguye mu Rwibutso rwo mu Murenge wa Rusarabuye kwirinda ingengabitekerezo ya Jenoside, ihakana n'ipfobya ryayo; bakimakaza gahunda ya Ndi Umunyarwanda.