Umuyobozi w'Akarere, Mme MUKAMANA Soline yagaragaje ko ibikorwa by’ubukorerabushake bikwiriye guhoraho; kandi bigakorwa na buri wese ushoboye.

Ibi yabivugiye mu Murenge wa Kinoni tariki 18 Ukuboza uyu mwaka asoza urugerero rudaciye ingando rw’Inkomezabigwi; icyiciro cya 11/2023 rwari rufite insanganyamatsiko igira iti :" URUGERERO, UMUCO W’UBUTORE N’UBUKORERABUSHAKE".

Gusoza urugerero byabereye mu Mirenge yose igize Akarere ka Burera;  bikaba byarahuriranye no kwizihiza umunsi mpuzamahanga w'ubwitange n'ubukorerabushake.

Umuyobozi w'Akarere, Mme MUKAMANA Soline; hamwe n'Umunyamabanga Nshingwabikorwa w'Umurenge wa Kinoni, Mme NYIRASAFARI Marie, CIP MUGENZI Jean Bosco; wari uhagarariye umuyobozi wa Polisi mu Karere; uwari uhagarariye umuyobozi w'Ingabo n'abahagarariye ibyiciro n'inzego zitandukanye muri uyu Murenge bifatanyije n'Abaturage b'uyu Murenge mu bikorwa byavuzwe hejuru.

Umuyobozi w’Akarere wungirije ushinzwe imibereho myiza y’abaturage, Bwana MWANANGU Theophile hamwe n'Umunyamabanga Nshingwabikorwa w'Umurenge wa Nemba n'abahagarariye izindi nzego muri uyu Murenge bifatanyije n'abaturage mu muhango wo gusoza urugerero rudaciye ingando rw'Inkomezabigwi; icyiciro cya 11/2023 no kwizihiza umunsi mukuru wavuzwe hejuru muri uyu Murenge.

Mu butumwa  bwe; Umuyobozi w’Akarere, Mme MUKAMANA Soline yashimye inzego zose zagize uruhare mu gutuma urugerero rukorwa neza; ashima kandi urubyiruko rusoje urugerero ku bikorwa rwakoze.

Yagize atai:"Ibikorwa by'ubukorerabushake bikwiriye gukorwa na buri wese ushoboye ; kandi bigahoraho; hazirikanwa ko ibikorwa by’ubukorerabushake  bigira uruhare rugaragara mu gukemura bimwe mu bibazo bibangamiye imibereho myiza y’abaturage . Ikindi kandi; ni n’umuco wo kwishakamo ibisubizo by’ibibazo bibangamiye iterambere muri rusange."

Yakanguriye abaturage b’Akarere ka Burera gusigasira ubumwe n'ubudaheranwa bw'Abanyarwanda, gukora neza amarondo hagamijwe kubumbatira umutekano, kwirinda amakimbirane n'ihohotera aho riva rikagera; kwirinda ibiyobyabwenge no kwirinda kuvana abana mu ishuri.

Umuyobozi w’Akarere, Mme MUKAMANA Soline yakanguriye kandi abatuye Akarere ka Burera kugira isuku umuco no kwitabira izindi gahunda zigamije imibereho myiza y'abaturage n'iterambere muri rusange harimo EjoHeza no kurwanya imirire mibi n'igwingira.

Yibukije abitabiriye igikorwa cyo gusoza urugerero n’abatuye Akarere ka Burera muri rusange ko ubumwe bw’Abanyarwanda ari zo mbaraga zabo; abasaba kwirinda ingengabitekerezo ya Jenoside; kuyihakana, kuyipfobya; ndetse n’ikindi cyose cyabangamira ubumwe n’ubudaheranwa bw’Abanyarwanda.