Kuri uyu wa Kane; tariki 22 Kamena , uyu Mwaka; ku isoko nyambukiranyamipaka rya Cyanika, mu Murenge wa Cyanika habereye umuhango wo gutangiza imurikabikorwa ry'Akarere ka Burera ry'umwaka wa 2023 rifite insanganyamatsiko igira iti:"Abafatanyabikorwa mu kwesa imihigo y'iterambere rirambye twabigize intego."

Iri murikabikorwa ryatangijwe ku mugaragaro n’Umujyanama wa Guverineri w’Intara y’Amajyaruguru, Bwana KARAKE Ferdinand wari uhagarariye Guverineri w’iyi Ntara muri uyu muhango.

Bwana KARAKE  yakiriwe n'Umuyobozi w'Akarere, Mme UWANYIRIGIRA Marie Chantal ; ari hamwe n’Umuyobozi w’Akarere wungirije ushinzwe iterambere ry’Ubukungu, Bwana NSHIMYIMANA Jean Baptiste, Umuyobozi wa Polisi mu Karere, Senior Superintendent of Police (SSP)  Aphrodis NKUNDINEZA, Perezida w’Ihuriro ry’Abafatanyabikorwa mu iterambere ry’Akarere, Bwana NDAYISABA Thomas Albert n’abandi Babayobozi batandukanye mu Karere.

Nyuma yo gutangiza ku mugaragaro igikorwa cy'imurikabikorwa; Abayobozi basuye ibikorwa bimurikwa.

Mu ijambo ritangiza iri Murikabikorwa, Bwana KARAKE yashimye Abafatanyabikorwa b’Akarere  ku ruhare rwabo mu iterambere ryako ndese n’abagatuye ;abasaba kunoza ibyo bakora no gukomeza kugira uruhare muri gahunda n’ibikorwa bigamije guteza imbere imibereho y’Abaturage.

Yagize ati:"Iki gikorwa cy'Imurikabikorwa ni ingenzi cyane; kubera ko; usibye kuba ari urubuga rwo kumurika ibyo Abafatanyabikorwa  bakora; Abantu bigira ku mikorere y'abandi . Ikindi kandi; Abafatanyabikorwa b’Akarere barahura; bakaganira ku Iterambere ry'Akarere n'Abagatuye. Uruhare rwanyu mu guteza imbere Akarere n'Abagatuye rurigaragaza. Ndabashimye; kandi mbifurije imurikabikorwa ryiza."

Asoza iki gikorwa cy’Imurikabikorwa tariki 23 Kamena, Umuyobozi w'Akarere wungirije ushinzwe Iterambere ry'Ubukungu,Bwana NSHIMYIMANA Jean Baptiste yashimiye Abafatanyabikorwa bakitabiriye ; abasaba gukomeza  guteza imbere no kunoza ibyo bakora.

Mu isozwa ry’iri Murikabikorwa; hahembwe Abafatanyabikorwa bahize abandi muri iki gikorwa;  bamwe bakaba barahawe ibikombe n’Ibyemezo by’ishimwe.