Guhera tariki 06/02/2023 kugera ku wa 09/02/2023, Urwego rw’Umuvunyi rwari mu Karere ka Burera; aho muri iyi minsi ine rwakoze ubukangurambaga mu Mirenge cumi n’irindwi  (17) igize Akarere bugamije kurushaho kurwanya no gukumira ibyaha bya ruswa ndetse n’Akarengane; ibi bikaba byarakozwe n’uru rwego muri gahunda yarwo isanzwe yo kwakira no gukemura ibibazo by’Abaturage bijyanye na ruswa n’akarengane

Ibibazo byakiriwe mu Mirenge byakemuwe ku bufatanye n’itsinda ry’Abakozi b’uru Rwego rw’Umuvunyi; harimo itsinda ryari riyobowe n’Umuvumyi Mukuru, Hon.NIRERE Madeleine; iryari riyobowe n’Umuvunyi wungirije ushinzwe gukumira no kurwanya akarengane, Hon. YANKURIJE Odette n’itsinda ryari riyobowe n’Umunyamabanga Uhoraho w’Urwego rw’Umuvunyi, Bwana MBARUBUKEYE Xavier; Ubuyobozi b’Akarere ka Burera, abagize inama y’umutekano itaguye y’Akarere na bamwe mu Bakozi b’Akarere. Ibibazo bitarakemukiyeho byahawe umurongo w’uburyo byakemuka.

Ku ikubitiro; iyi gahunda yo gusura Abaturage aho batuye yahereye mu Murenge wa Rurasabuye; aho, Umuvumyi Mukuru, Hon.  NIRERE Madeleine; afatanyije n’Umuyobozi w’Akarere, Mme UWANYIRIGIRA Marie Chantal; abagize inama y’umutekano itaguye y’Akarere na bamwe mu Bakozi b’Akarere bakiriye; banakemura ibibazo by’Abaturage babagejejeho.

Mu butumwa Hon. NIRERE yagejeje ku Baturage b’Umurenge wa Rusarabuye  yabasabye kujya bemera no kubahiriza ibyemezo byafashwe n’Inzego z’Ubutabera hagamijwe kubahiriza amategeko, kwirinda ibihombo biteza bamwe ubukene mu miryango imwe n’imwe; bikaba kandi bituma habaho kwirinda amakimbirane.

Hon. NIRERE yasabye ababana nk’Umugore n’Umugabo batarasezeranye imbere y’Amategeko gusezerana imbere y’Amategeko mu rwego rwo kwirinda ingaruka ziterwa no kubana nk’Umugabo n’Umugore batarasezeranye.

Ku ngingo ijyanye no gukumira no kurwanya ruswa n’akarengane; Abaturage basabwe kwirinda ruswa n’ibyaha bifitanye isano na yo; kandi bagatanga amakuru ku gihe yerekeye iki cyaha; Abayobozi basabwa gukemura ku gihe ibibazo bagejejweho n’Abaturage; bakirinda kubasiragiza.

Mu ijambo rye, Umuyobozi w’Akarere, Mme UWANYIRIGIRA Marie Chantal yashimye Urwego rw’Umuvinyi ku bw’iyi gahunda agira ati:" Kuba Urwego rw’Umuvunyi nk’Urwego rufite ubunararibonye mu gukemura ibibazo by’Abaturage rwaje mu Karere muri iyi gahunda yo kwakira no gukemura ibibazo  bijyanye na ruswa n’akarengane bitwunganira mu gukemura ibibazo by’Abaturage birimo ibyatwisobwe cyangwa ibyibagiranye. Ubuyobozi bw’Akarere burashima cyane uru rwego; kandi inama rwatugiriye tuzazikurikiza."

Ku wa gatanu; Itsinda ry'Abakozi b'Urwego rw'Umuvunyi riyobowe n'Umunyamabanga Uhoraho w'uru rwego,Bwana MBARUBUKE Xavier ryagaragaje ishusho rusange y'ibibazo bakiriye, ibyakemutse, ibyahawe umurongo w'uburyo byakemuka n'ibizakomeza gukurikiranwa n'uru rwego ndetse n'Akarere.

Gahunda yo kugaragaza ishusho rusange y'ibibazo byakiriwe, ibyakemutse n'ibizakomeza gukurikiranwa yabereye mu cyumba cy'inama cy'Akarere. Yitabiriwe na Guverineri w'Intara y'Amajyaruguru, Mme NYIRARUGERO Dancille, abagize Komite Nyobozi, Visi Perezida w'Inama Njyanama y'Akarere n'abagize inama y'umutekano itaguye y'Akarere. Aba Bashyitsi bahawe ikaze n'Umuyobozi w'Akarere ; ari hamwe n'abagize Komite Nyobozi n'abagize inama y'umutekano itaguye y'Akarere.