Umuganda rusange usoza uku kwezi k’Ukwakira 2025 wabaye kuri uyu wa gatandatu mu Mirenge igize Akarere ka Burera waranzwe n'ibikorwa birimo gutera ibiti bivangwa n'imyaka mu mirima y'abaturage n'ahandi hanyuranye hagamijwe kurwanya isuri no kurengera ibidukikije muri rusange, gusana ibiraro, gusibura imiyoboro y'amazi, gutunganya imihanda n'inzira z'imigenderano, kubakira imiryango itishoboye inzu, ubwiherero n'uturima tw'imboga. 

Umuyobozi w'Akarere, Mukamana Soline, abandi bagize Komite Nyobozi y'Akarere n'abagize, Inama y'umutekano itaguye y'Akarere n'abakozi b'Akarere bifatanyije n'abaturage b'Akagari ka Musasa, mu Murenge wa Kinyababa gutera ibiti kuri site y'ubuhinzi ya Gitoma.

Umuganda wabereye mu Kagari ka Musasa witabiriwe n'Umunyamabanga Uhoraho muri Minisiteri y’Uburinganire n’iterambere ry’umuryango (MIGEPROF), Mireille Batamuliza, Umuyobozi Mukuru Wungirije w’Urwego rw’Igihugu rushinzwe gukurikirana ishyirwa mu bikorwa ihame ry’uburnganire bw’abagabo n’abagore, Rurihose Habiyaremye Florien, Umunyamabanga Nshingwabikorwa w'Intara y'Amajaruguru, Ngendahimana Pascal n'abandi Bayobozi mu nzego zinyuranye.

Abashyitsi bitabiriye umuganda kuri site ya Gitoma bakiriwe n'Umuyobozi w'Akarere wabashimiye kuba bifatanyije n'abatuye ako Kagari mu gikorwa cyo gutera ibiti kuri iyo site y'ubuhinzi.

Yakanguriye abawitabiriye kurangwa n'isuku ahantu hose; bakayigira umuco; bakitabira n'izindi gahunda za Leta zigamije imibereho myiza y'abaturage n'iterambere muri rusange zirimo kwizigamira muri EjoHeza, gutanga Mituweli, kunganira gahunda yo kugaburira abana ku ishuri, guharanira iterambere no gusigasira Ubumwe nUbudaheranwa bw'Abanyarwanda.

Mu ijambo rye, Umunyamabanga Uhoraho muri MIGEPROF yasabye abitabiriye umuganda kubahiriza ihame ry'uburinganire bw'abagore n'abagabo, kwirinda amakimbirane n'ihohotera iryo ari ryo ryose ; bagaharanira kugira umuryango utekanye, kandi uteye imbere.