Mu cyumba cy'inama cy'Akarere habereye ikiganiro n'Abanyamakuru cyayobowe n'Umuyobozi w'Akarere, Mukamana Soline wabagaragarije ishusho rusange y'Akarere harimo amahirwe y'ishoramari ahari; yakira, kandi asubiza ibibazo bamubajije. 

Icyo kiganiro cyitabiriwe na Perezida w'Inama Njyanama y'Akarere, Bizimungu Jean Baptiste, abagize Komite Nyobozi y'Akarere n'Abanyamabanga Nshingwabikorwa b'Imirenge.

Yagaragaje ko imirimo ikorwa mu Karere ka Burera ishingiye ahanini ku buhinzi, ubworozi n’ubucukuzi bw’amabuye y’agaciro; ibihingwa bihahingwa bikaba byiganjemo ibirayi, ibigori, ibishyimbo n’ingano.

Yagize ati:" Mu Karere ka Burera hari amahirwe y’ishoramari ashingiye ku bukerarugendo burimo Ibiyaga bya Burera na Ruhondo, Igishanga cya Rugezi, Ikirunga cya Muhabura ndetse n’ubucuruzi bwambukiranya umupaka ku mupaka wa Cyanika uhuza Akarere ka Burera na Gisoro ya Uganda. Ishoramari ryakorwa kandi mu buhinzi kubera ko Akarere ka Burera gafite ubutaka bwera; kandi buhingwa ibihe yose bitewe n’ikirere cyaho."

Yakomeje agira ati:"Akarere ka Burera ni igicumbi cy’amateka kuko hari Igicumbi cya Nyabingi, ibisagaratongo by’Umwami Ruganzu Ndoli n’ibindi. Ni Akarere kabereye kandi ubucuruzi nyambukiranyamipaka kuko gahana imbibi n’igice kinini cy’Igihugu cya Uganda dore ko mu Mirenge 17 ikagize, itandatu muri yo ikora kuri Uganda."

Yagaragaje ko Akarere ka Burera gafite ingo 91,786; aho ikigereranyo cy’ingo zifite amashanyarazi ari 52.7% (Ibarura rusange ryo muri 2022); intego ikaba ko mu mwaka wa 2029 ingo zose zizaba zifite amashanyarazi.

Avuga ku mishinga yakozwe mu kwegereza abaturage amazi meza; yagaragaje ko hubatswe umuyoboro wa Ruhunde-Rushara (62Km), uwa Nyabizi 69Km wubatswe ku bufatanye na WASAC, umuyoboro wa Rugarambiro (8Km), umuyoboro wa Kabere-Muhotora (1.6 Km) wubatswe ku bufatanye na Water Aid Rwanda, umuyoboro wa Nganzo-Gatebe (41.86 km) na Rusekera-Gatare yubatswe bufatanye na World Vision Rwanda, umuyoboro wa Bushoka-Nyanga mu Murenge wa Kinoni n’uwa Nyirantarengwa mu Murenge wa Rugengabali; hasanwa imiyoboro 15 ishaje mu Mirenge ya Bungwe, Kivuye, Butaro na Kinyababa.

Yagaragaje imishinga yo kwegereza abaturage amazi meza harimo umuyoboro wa Nyabizi-Kagogo mu Murenge wa Kagogo uri hafi kurangira, umuyoboro wa Mahongora-Kajerejeri mu Murenge wa Rusarabuye n’Uruganda rw’amazi rugiye kubakwa mu Murenge wa Rusarabuye; kandi ko hazasanwa wa Mutobo.

Ku byerekeye imikoreshereze myiza y’ubutaka, Umuyobozi w’Akarere yavuze ko hatangiye gukorwa igishushanyo mbonera cy’Akarere cy’imikoreshereze y’ubutaka; kandi ko hazatunganywa igishushanyo mbonera cy’Ubukerarugendo; kandi ko abaturage bazakomeza gutuzwa mu Midugudu no kwimura abantu mu maregeka

Ku bijyanye no gutwara ibintu n’abantu, Umuyobozi w'Akarere yagaragaje ko imihanda yakozwe muri gahunda ya Feeder Roads (imihanda igera ku mihanda minini) ireshya na 220.3 Km; kandi ko yitabwaho ku buryo buhoraho, imihanda yakozwe muri gahunda ya VUP ireshya na 246.7Km; ko hasanwe Umuhanda wa Gahunga-Nyagahinga-Kidaho; kandi ko hakomeje gusanwa n’indi mihanda y’imigenderano ihuza Utugari n’Imidugudu

Yongeyeho ko hari kubakwa umuhanda wa kaburimbo wa Butaro-Butaro-Kidaho ureshya na 63Km; kandi ko imirimo yo kuwubaka igeze kure, kubaka umuhanda wa Butaro-Gicumbi ureshya na 35Km (hakaba hagishakishwa igengo y’imari yo kuwutangira); umuhanda Gahunga-Kirambo-Ruhunde uzashyirwamo kaburimbo iciriritse; ukaba waramaze gukorerwa inyigo; hakaba hari gukorwa ubuvugizi kugira ngo haboneke ingengo y’imari; kandi ko Akarere gafite gahunda yo kubaka gare izafasha abagenzi gutega imodoka izubakwa ku muhanda Base-Butaro-Kirambo.

Mu rwego rwo kongera umusaruro w’ubuhinzi n’ubworozi, Umuyobozi w’Akarere Mukamana Soline yagaragaje ko hateganyijwe kubakwa isoko ry’Amatungo,  ibagiro ry’Amatungo maremare, kongera ubuso bwuhirwa mu bishanga biri mu Karere, kubaka Ubuhunikiro bw’Ibirayi  no kuhira imyaka mu gishanga cya Kamiranzovu.

Ku byerekeye ubukungu, yavuze ko hateganyijwe kubakwa isoko rigezweho rya Butaro, gusana amasoko ya Gahunga, Rugarama, Gitenge, Kirambo n’andi ashaje, kubaka agakiriro mu Murenge wa Rugarama no kubaka amasoko mato ku muhanda munini wa Base- Butaro-Kidaho.

Muri gahunda yo guteza imbere; yagaragaje ko hari kongerwa inyubako ku Ishuri Nderabarezi rya Kirambo (TTC-Kirambo) n’Ishuri ry’Icyitegererezo rya Jean De La Mennais; kandi ko mu bindi bikorwa harimo gukomeza gusana ibyumba by’amashuri bishaje 143, kubaka ibyumba bishya by’Amashuri bishya aho muri uyu mwaka hari kubakwa ibyumba 56; mu mwaka utaha hakazubakwa ibyumba by’Amashuri 37 n’ubwiherero 85.

Umuyobozi w’Akarere yagaragaje ko Akarere ka Burera gafite Ibitaro byigisha byo ku rwego rwa II bya Butaro,Ibigo nderabuzima 19, Amavuriro y’ibanze 58, Amavuriro y’ibanze yo ku rwego rwa II 4; habaka hagiye gusanwa Ibigo nderabuzima bishaje no kubiha ibikoresho n’abakozi; bikaba bizakorwa mu mwaka w’Ingengo y’Imari wa 2025-2026 .

Umuyobozi w'Akarere na Perezida w'Inama Njyanama y'Akarere bashimye Abanyamakuru bagiranye ikiganiro ku ruhare bagira mu kwigisha abaturage no kubakangurira kwitabira gahunda za Leta zinyuranye zigamije imibereho myiza n'iterambere muri rusange.

Umuyobozi w’Akarere yabashimye agira ati:"Itangazamakuri ni Umufatanyabikorwa w’ingenzi w’Akarere. Mudufasha kumenya ahari ibibazo bibangamiye iterambere ry’imibereho y’abaturage; ahari ibibazo by’akarengane ndetse n’ibindi binyuranye bitameze neza cyangwa bikorwa mu buryo butanoze cyangwa butemewe; bityo Ubuyobozi bukabikurikirana; bukabikemura. Ndabasaba gukomeza ubwo bufatanye; bityo dufatanye guteza imbere umuturage, Akarere n’Igihugu muri rusange."

Yasubije ibibazo byose yabajijwe n’Abanyamakuru 16 bitabiriye icyo kiganiro bakorera Ibitangazamakuru binyuranye bikorera mu Rwanda.