Ikipe y’Abakobwa/Abagore y’Umurenge wa Butaro, mu Karere ka Burera izahagararira Intara y’Amajyaruguru mu Marushanwa "UMURENGE KAGAME CUP 2022-2023" ku rwego rw’Igihugu.

Ikipe ya Butaro yakatishije tike yo kuzahagararira iyi Ntara muri aya Marushanwa ku rwego rw’Igihugu nyuma yo gutsinda Ikipe y’Umurenge wa Nyamiyaga, Akarere ka Gicumbi kuri penaliti 4-2; ibi bikaba byarabaye nyuma yo kunganya 0-0; umukino wahuje aya makipe yombi ukaba warabereye kuri Sitade ya Gicumbi ku Cyumweru tariki 07 Mata uyu mwaka.

Ku mukino wayo wa mbere ku rwego rw’Intara; Butaro yatsinze Ikipe y’Umurenge wa Muhoza; yari ihagarariye Akarere ka Musanze ibitego 3-0. Aya makipe yakiniye  kuri Sitade UBWOROHERANE; mu Karere ka Musanze.

Ku mukino wa Butaro wa kabiri ku rwego rw’Intara;  yanganyije  n’Ikipe y’Umurenge wa Nemba,Akarere ka Gakenke 0-0; umukino wahuje aya makipe ukaba warabereye ku kibuga kiri mu Kagari ka Kabyiniro, Umurenge wa Cyanika, mu Karere ka Burera.

Umikino yabereye kuri Sitade ya Gicumbi yakurikiwe na  Guverineri w'Intara y'Amajyaruguru, Mme NYIRARUGERO Dancille; wari hamwe n’Umuyobozi wa Polisi muri iyi Ntara, CSP Francis MUHETO, Umuyobozi w'Akarere ka Gicumbi, Bwana NZABONIMPA Emmanuel, Umuyobozi w'Akarere ka Rulindo, Mme MUKANYIRIGIRA Judith , Umunyamabanga Nshingwabikorwa w'Akarere,  Bwana Frank IBINGIRA n’abandi Bayobozi n’Abafatanyabikorwa batandukanye ku rwego rw’Intara y’Amajyaruguru n’Uturere twa Burera, Gakenke na Musanze.

Mu mikino ya nyuma y’aya Marushanwa ku rwego rw’Intara y’Amajyaruguru yabereye i Gicumbi; Ikipe y’Umurenge wa Butaro; yari ihagarariye Akarere ka Burera; yaherekejwe n’Umunyamabanga Nshingwabikorwa w'Akarere,  Bwana Frank IBINGIRA; ari hamwe n’Umunyamabanga Nshingwabikorwa w'Umurenge wa Butaro, Bwana KAYITSINGA Faustin n'Umunyamabanga Nshingwabikorwa w'Umurenge wa Rugengabari, Bwana ZIMURINDA Tharcisse.

Nyuma yo kwegukana intsinzi; Ikipe y’Umurenge wa Butaro yahawe igikombe n’bihumbi ijana by’Amafaranga y’u Rwanda (100,000 Frw).

Nyuma yo gushyikirizwa igikombe; Bwana IBINGIRA yashimye Kapiteni w’iyi Kipe n’Abakinnyi muri rusange ku intsinzi begukanye; abasaba kwitegura neza umukino uzabahuza n’Ikipe bazahura ku rwego rw’Igihugu.

Mu ijambo rye ry’ishimwe; Umunyamabanga Nshingwabikorwa w'Akarere yagize ati:"Mu izina ry’Umuyobozi w’Akarere; ndabashimiye cyane ku intsinzi mwegukanye ihesha ishema Akarere; ihesha ishema Umurenge wa Butaro;ikaba namwe ibahesha ishema."

Bwana IBINGIRA yasezeranyije Ikipe ya Butaro ko Ubuyobozi bw’Akarere buzakomeza  kubaba hafi kugira ngo bazabashe gutsinda umukino bazakina ku rwego rw’Igihugu.