Mu mikino y'amajonjora y'Amarushanwa UMURENGE KAGAME CUP 2024-2025 ku rwego rw'Intara y'Amajyaruguru yabereye ku kibuga cya TTC Kirambo, mu Murenge wa Cyeru kuri uyu wa gatatu tariki ya 5 Werurwe, ikipe y’umupira w’amaguru y’abakobwa y’Umurenge wa Nemba yatsinze 1-0 iy’Umurenge wa Mbogo, mu Karere ka Rulindo.

Uwo mukino witabiriwe n'Umuyobozi w'Akarere ka Burera, Mukamana Soline, Umuyobozi w'Akarere ka Rulindo, Mukanyirigira Judith, Umunyamabanga Nshingwabikorwa w'Akarere, Karangwa James, n’abandi bayobozi mu nzego zinyuranye mu Karere ka Burera na Rulindo.

Mu kiganiro Umuyobozi w'Akarere ka Burera, Mukamana Soline yagiranye n'abitabiriye imikino yabereye kuri icyo kibuga yabashimiye kuba bayitabiriye ari benshi, abasaba gukundisha abandi siporo n’imyidagaduro.

Yagaragaje akamaro ko gukora siporo agira ati:" Umuntu ukora siporo agira ubuzima buzira umuze kuko bimurinda indwara zinyuranye; bityo agakora, akiteza imbere. Siporo yubaka, ikanateza imbere ubumwe, ubusabane, urukundo n’umuco w’ubufatanye n’ishyaka mu bantu. Siporo iri mu byo iterambere, ubumwe n’ubufatanye byubakiyeho. Dufatanye gukundisha abatayikora kuyikora."

Yagaragaje kandi ko iyo urubyiruko rwitabiriye siporo birurinda kwishora mu biyobyabwenge, uburara,ubuzererezi n’indi myitwarire n’ibikorwa binyuranye byagira ingaruka mbi ku hazaza habo; arusaba kujya ruyitabira no kurangwa n’imyitwarire myiza.

Umuyobozi w’Akarere yakanguriye kandi abitabiriye imikino yabereye kuri TTC Kirambo kwitabira gahunda za Leta zirimo isuku n’isukura, gutanga ku gihe Mituweli, kwizigamira muri Ejo Heza, kubumbatira umutekano n’ubumwe bw’Abanyarwanda, kwirinda no kugira uruhare mu kurwanya ubusinzi, imirire mibi n’igwingira, ibiyobyabwenge n’amakimbirane mu miryango.