Ku Itariki 01 Ukwakira 2021, Imboni z’Umutekano 634 zasoje Amahugurwa zakoreraga i Nkuba; mu Murenge wa Kinoni zari zimazemo iminsi Icumi.

Mu Masomo zahawe harimo  Indangagaciro y’Ubutwari, Ubwitange no gukunda Igihugu; n’Uruhare rwazo mu kubaka u Rwanda twifuza; Urujya n’Uruza ku Mipaka n’Amategeko abigenga; Uruhare rw’Indangagaciro mu gusigasira Umutekano muri rusange; Gahunda za Leta zirebana n’Imibereho Myiza , Ubutore no kwishakamo Ibisubizo; Uburyo bwo gucunga Umutekano w’Umupaka ku Manywa ndetse na Nijoro; Amateka y’u Rwanda; Isano iri hagati y’Umuturage n’Igihugu, Uburenganzira n’Inshingano by’Umwenegihugu; Ingaruka zo gukoresha Ibiyobyabwenge; Uruhare rw’Umuturage mu kwirindira Umutekano (Community Policing) na Ndi Umunyaranda; Isanomuzi ihuza Abanyarwanda basangiye.

Ubumenyi Imboni z’Umutekano zahawe buzazifasha gusohoza inshingano zo gufatanya n’izindi Nzego gucunga Umutekano ku Byambu bibarizwa mu Mirene ikora ku Mupaka hagamijwe gukumira iyinjizwa ry’Ibiyobyabwenge na Magendu mu Karere ka Burera bafunga Inzira ababyinjiza mu Karere bacamo.

Itorero ry’Imboni z’Umutekano ryasojwe ku mugaragaro n’Umunyamabanga wa Leta muri Minisiteri y’Urubyiruko n’Umuco, Hon. BAMPORIKI Edouard.

Uyu Mahango witabiriwe kandi na Guverineri w’Intara y’Amajyaruguru, Mme NYIRARUGERO Dancille n’Abagize Inama y’Umutekano itaguye y’iyi Ntara.

Ubwo aba Bashyitsi bageraga mu Karere ka Burera bakiriwe n’Umuyobozi wako, Mme UWNYURIGIRA Marie Chantal wagaragaje uko  Ikibazo cy’Ibiyobyabwenge na Magendu kifashe mu Karere ka Burera n’Ingamba kafashe mu rwego rwo kubirwanya.

Mu Kiganiro, Hon. BAMPORIKI Edouard yagejeje ku Imboni z’Umutekano cyavugaga kuri "Ndi Umunyarwanda; Isanomuzi ihuza Abanyarwanda basangiye." yazibwiye ati:"Bana b’u Rwanda; Uwitabye kare atumwa kure; mwe rero mwahamagawe mukitaba vuba mutazuyaje muramenye ntimuzatsindwe Urugamba mugiyemo rwo kurwanya no kurandura burundu Ikibazo cy’Ibiyobyabwenge, Magendu, Kwambuka Umupaka mu buryo bunyuranyije n’Amategeko n’ibindi byose byagira ingaruka ku Mutekano n’Iterambere  ry’u Rwanda n’Abarutuye. Muzimane u Rwanda; kandi murutamike Abakuru n’Abato mubatoza gushyira imbere Isanomuzi dusangiye ari yo ‘Ubunyarwanda’."

Umwe mu Imboni z’Umutekano  witwa DUSINGIZUMUKIZA Firmin wavuze mu izina rya bagenzi be yahamirije imbere y’Abashyitsi n’Ubuyobozi bw’Akarere  ko bagiye kurushaho gufatanya n’izindi Nzego  guca Ibiyobyabwenge na Magendu bafunga Inzira zikoreshwa n’ababyinjiza mu Karere ka Burera.

DUSINGIZUMUKIZA yagize ati:"Twiyemeje kuba Imboni z’Umutekano mu kurandura burundi Ibiyobyabwenge , Magendu no kwambuka Umupaka mu nzira zitubahirije Amategeko. Twiyemeje kandi kurwanya Ibibazo bibangamira Imibereho Myiza y’Abaturage. Turabyiyemeje; kandi tuzabugeraho dufatanyije n’Inzego bireba.Ibyo duhize tuzabihigura dufatanyije n’Ubuyobozi bw’Akarere n’izindi Nzego zikorera mu Karere."