Uyu munsi, imiryango 38 yabanaga nk’umugabo n’umugore itarasezeranye imbere y’amategeko yasezeranye imbere y’amategeko (26 yo mu Murenge wa Gatebe na 12 yo mu Murenge wa Kivuye); basezeranyijwe n'Abanyamabanga Nshingwabikorwa b'Imirenge batuyemo.

Asezeranya iyo miryango 26, Umunyamabanga Nshingwabikorwa w'Umurenge wa Gatebe, Mwambutsa Amani Wilson yayisobanuriye ibyiza byo gusererana agira ati:"Iyo Umugabo n’umugore batasezeranye hari uburenganzira bumwe na bumwe baba bigomwe; ndetse hari uburenganzira bagomwa abana babo. Kubana barasezeranye bikemura ibibazo by’ihohotera ry’uburyo bunyuranye. Gusezerana byongera kandi icyizere hagati yabo no gukomera k’umubano wabo. Ndabashimira kuba mwafashe iki cyemezo cyiza gishimangira icyizere n’urukundo; kikaba n’inkingi ya mwamba y’ahazaza heza h’umuryango wanyu."

Yongeyeho ati:"Iyo umugore n’umugabo babana barasezeranye bafatanya mu iterambere ry’umuryango wabo n’uburere bw’abana kubera ko baba barahanye isezerano ryo kudahemukirana; kandi buri wese agerageza kuryubahiriza. Isezerano mugiranye uyu munsi ribabere umusingi w’imibanire myiza, kurera neza abana banyu, iterambere, amahoro n’urugero rwiza kuri bose."

Mwambutsa yabakanguriye kandi kwitabira no kubahiriza gahunda za Leta zigamije imibereho myiza y'abaturage n'iterambere muri rusabge zirimo kwirinda ubusinzi, ibiyobyabwenge, amakimbirane no gukumira inda ziterwa Abangavu.

Yasabye abashakanye bitabiriye ibyo birori batari basezerana imbere y’amategeko gutera ikirenge mu cy’iyo miryango yasezeranye.