Imiryango Magana ane na mirongo ine n’ibiri (442) ibarizwa mu Mirenge igize Akerere ka Burera yasezeranye imbere y’Amategeko; ikaba yabanaga itarasezeranye imbere y’Amategeko. Iyi gahunda yabaye kuri uyu wa gatatu tariki 08 Werurwe ubwo; kimwe n’ahandi mu Gihugu; mu Karere ka Burera hizihizwaga Umunsi Mpuzamahanga w'Umugore wizihijwe ku nsanganyamatsiko igira iti :"Ntawe uhejwe:Guhanga udushya n'Ikoranabuhanga mu biteza imbere ihame ry'uburinganire."

 Ku rwego rw'Akarere; uyu muhango wabereye mu Murenge wa Cyanika; aho Umuyobozi w'Akarere, Mme UWANYIRIGIRA Marie  Chantal , Umuyobozi w'Ingabo mu Karere, Lt Col Sam MWESIGYE n'Umuhuzabikorwa w’Inama y’Igihugu y’Abagore ku rwego rw'Akarere, Mme UWAMWIZA Catherine bifatanyije n'Abaturage b'uyu Murenge mu birori byo kwizihiza uyu munsi byabereye mu Kagari ka Kabyiniro.

Ibirori byo kwizihiza uyu munsi Mpuzamahanga w'Umugore byabereye mu Mirenge yose igize Akarere ka Burera. Wizihijwe n'Abayobozi b'Inzego zitandukanye mu Karere, Abafatanyabikorwa b'Akarere n'ibyiciro bitandukanye by'Abaturage.

Mu rwego rwo kwimakaza ihame ry'uburinganire;bijyana n'Icyumweru cyahariwe ubukangurambaga bugamije guteza imbere ihame ry'uburinganire bwatangirijwe ku mugaragaro mu Murenge wa Rwerere ku itariki 07 Werurwe; bufite Insanganyamatsiko igira iti: "Ihame ry’Uburinganire; Inkingi y’Iterambere n’Iterambere rirambye"; binajyana no kwizihiza uyu Munsi Mpuzamahanga w'Umugore; uyu munsi; mu Karere ka Burera hasezeranye imiryango 442 yabanaga itarasezeranye imbere y'amategeko.

Umuyobozi w'Akarere yasezeranyije; anakira indahiro z'imiryango yasezeranye yo mu Mirenge ya Cyanika, Kagogo na Rugarama. Ibirori byo kwizihiza Umunsi Mpuzamahanga w'Umugore mu Karere ka Burera byaranzwe kandi no koroza imwe mu Miryango itishoboye; imwe ikaba yahawe Inka; indi ihabwa Intama n'ubundi bufasha butandukanye. Habayeho kandi kwigisha Ababyeyi uburyo bwo gutegura indyo yuzuye no guha Abana indyo yuzuye.

Ku rwego rw’Intara y’Amajyaruguru; Icyumweru cyahariwe ubukangurambaga bugamije guteza imbere ihame ry’Uburinganire cyatangirijwe mu Karere ka Burera; akaba ari na ho cyatangirijwe ku mugaragaro ku rwego rw’Intara y’Amajyaruguru. Ubu bukangurambaga bwatangijwe na Guverineri w’Intara y’Amajyaruguru, Mme NYIRARUGERO Dancille; wari hamwe n'Umugenzuzi Mukuru Wungirije w’Urwego rw’Igihugu rushinzwe kugenzura iyubahirizwa ry’Uburinganire n’Ubwuzuzanye bw’Abagore n’Abagabo mu iterambere ry’Igihugu ( Gender Monitoring Office), Bwana RURIHOSE Florien .

Mu butumwa Umuyobozi w'Akarere n'abandi Bayobozi mu Karere bagejeje ku Baturage bitabiriye ibirori byo kwizihiza Umunsi Mpuzamahanga w'Umugore babakanguriye kwirinda amakimbirane n'ibiyobyabwe; babasaba kandi gusezerana imbere y'Amategeko, kwandikisha Abana mu bitabo by'irangamimerere no kwimakaza ihame ry'uburinganire.

Avuga ku ngamba zigamije gukemura ikibazo cy’Imiryango itarasezerana imbere y’Amategeko; Umuyobozi w’Akarere yagize ati:"Dushyize imbaraga mu bukangurambaga bwo kuyegera; dusura urugo ku rundi, dufatanyije n’amadini n’amatorero hamwe n’izindi nzego, tukayereka ingero zifatika zabafasha guhindura imyumvire; bakitabira gusezerana; dore ko bitanasaba ubushobozi buhambaye."

Yagize kandi ati :"Izo ngamba zizadufasha kugera ku ntego twihaye yo kongera umubare w’imiryango ibanye binyuze mu nzira zubahirije amategeko; bityo tubashe no gukumira ibibazo bikigaragara birimo n’amakimbirane bitezwa umurindi no kuba abayigize baba babana batarasezeranye imbere y’Amategeko ."

 NZABAKURIKIZA Theogene; ufite imyaka 76 n’Umugore we NYIRANZOGA Angélique; ufite imyaka 66; batuye mu Kagari ka Kayenzi, Umurenge wa Kagogo; ni bamwe mu basezeranye imbere y’Amategeko. Bashimye iyi gahunda yo kwegera Abaturage mu Mirenge batuyemo hagamijwe gusezeranya imiryango ibana itarasezeranye.

NZABAKURIKIZA yagize ati: "Natinze gusezerana n’Umugore wanjye imbere y’Amategeko; ariko sinaheze. Inkono ihiriye igihe.  Amasaziro yacu agiye kurushaho kuba meza kubera ko dusezeranye imbere y’Amategeko. Gusezerana kwacu birushijeho gushimangira  no gukomeza umubano wacu; kandi; n’ubwo dushaje; bizarushaho kongera  urukundo wacu."