Kuri uyu wa kane imiryango 61 yabanaga nk’umugabo n’umugore itarasezeranye imbere y’amategeko yasezeranye imbere y’amategeko (37 yo mu Murenge wa Butaro, 23 yo mu Murenge wa Rwerere n’umwe wo mu Murengewa Kinyababa); basezeranyijwe n'Abanyamabanga Nshingwabikorwa b'Imirenge batuyemo.

Asezeranya imiryango 37, Umunyamabanga Nshingwabikorwa w'Umurenge wa Butaro, Kayitsinga Faustin yasobanuriye iyo miryango ibyiza byo gusererana agira ati:"Iyo Umugabo n’umugore batasezeranye hari uburenganzira bumwe na bumwe baba bigomwe; ndetse hari uburenganzira bagomwa abana babo. Kubana barasezeranye bikemura ibibazo by’ihohotera ry’uburyo bunyuranye. Gusezerana byongera kandi icyizere hagati yabo no gukomera k’umubano wabo."

Yagize kandi ati:"Iyo umugore n’umugabo babana barasezeranye bafatanya mu iterambere ry’umuryango wabo n’uburere bw’abana kubera ko baba barahanye isezerano ryo kudahemukirana; kandi buri wese agerageza kuryubahiriza. Isezerano mugiranye uyu munsi ribabere umusingi w’imibanire myiza, kurera neza abana banyu, iterambere, amahoro n’urugero rwiza kuri bose. Ababana batarasezeranye imbere y’amategeko ndabasaba gusezerana."

Yabakanguriye kandi kwitabira no kubahiriza gahunda za Leta zigamije imibereho myiza y'abaturage n'iterambere muri rusabge zirimo kwirinda ubusinzi, ibiyobyabwenge, amakimbirane no gukumira inda ziterwa Abangavu.

Yabasabye kandi kwita ku buzima bw'umwana mu minsi igihumbi ndetse n'ubuzima bw’Umubyeyi; abatwite bakipimisha inda inshuro umunani, kubyarira kwa Muganga, gukingiza abana inkingo zose n'imikurire; kubahiriza ihame ry'uburinganire, kwirinda gukoresha abana imirimo itemewe; kandi ivunanye no kubahiriza ubundi burenganzira bw'abana.

Yabasabye na none kurangwa n'isuku; haba ku mubiri, aho batuye, aho bakorera n'ahahurira abantu benshi; kurwanya imirire mibi n'igwingira ry'abana bato bashyira mu bikorwa amabwiriza arimo kugaburira abana indyo yuzuye no kubungabunga umutekano bakora irondo neza.