Kuri iki cyumweru tariki 08 Werurwe 2026, mu Mirenge igize Akarere ka Burera habaye ibirori byo kwizihiza Umunsi Mpuzamahanga w'Umugore wizihijwe ku nshuro ya 51 ku nsanganyamatsiko igira iti:'' Umugore ni uw'agaciro."

Umuyobozi w'Akarere, Mukamana Soline, Perezida w'Inama Njyanama y'Akarere, Bizimungu Jean Baptiste, Umuhuzabikorwa w’Inama y’Iguhugu y’abagore mu Karereka Burera, Uwamwiza Catherine, Umuyobozi w'Inkeragutabara mu Karere, Lt Col Viateur Rudatinya, Umuyobozi wa Polisi mu Karere, SP Viateur Munyurasi Gakara n'abandi bayobozi mu Karere bifatanyije n'abaturage b'Akagari ka Murwa, muri Kivuye kwizihiza uyu Munsi Mukuru.

Ibyo birori byitabiriwe na Guverineri w'Intara y'Amajyaruguru, Mugabowagahunde Maurice, Honorable Senateri Umuhire Adria, Honorable Depite Nyiramana Christine, Honorable Depite Nzamwita Deogratias, Umuhuzabikorwa w’Inama y’Iguhugu y’abagore ku rwego rw'Igihugu, Nyirajyambere Berancille, Umuyobozi w’Urwego rushinzwe ubugenzacyaha mu Ntara y’Amajyaruguru, Beline Mukamana n'Umuhuzabikorwa w’Inama y’Iguhugu y’abagore mu Ntara y’Amajyaruguru, Nyirasafari Diane.

Yakira abashyitsi bitabiriye ibirori, Umuyobozi w’Akarere, Mukamana Soline yagize ati:"Mumfashe gushima Nyakubahwa Perezida wa Repulika, Paul Kagame wahaye abagore n'abakobwa agaciro. Nsaba abagore n’abakobwa gusigasira ako gaciro yaduhaye; tuba indashyikirwa mu byo dushinzwe ndetse n’ibyo dukora, guharanira kugira imiryango itekanye  kandi iteye imbere no kugira uruhare mu iterambere ry’Igihugu."

Umuyobozi w'Akarere wungirije ushinzwe iterambere r’ubukungu, Nshimyimana Jean Baptiste yifatanyije n’abaturage b’Umurenge wa Rugengabali mu birori byo kwizihiza uyu munsi mukuru byabereye mu Kagari ka Nyanamo.

Mu butumwa Abayobozi bose bagejeje ku bitabiriye ibirori babakanguriye kurangwa n'isuku, kurwanya imirire mibi n'igwingira ry'abana bato, kwita ku burere n'uburezi bw'abana no kwita ku buzima bw'umwana mu minsi igihumbi ibanza y'ubuzima bwe. 

Babasabye kandi guharanira kugira imiryango itekanye, kandi iteye imbere; birinda ibiyobyabwenge, ibinyobwa bitujuje ubuziranenge, amakimbirane, ihohotera aho riva rikagera, barwanya inda ziterwa abangavu, kandi bakimakaza umuco w'ibiganiro mu miryango. 

Ababyeyi bitabiriye ibyo birori basabwe kwita ku nshingano zabo; bakarerera neza u Rwanda, bagatoza abana indangagaciro na kirazira z'umuco nyarwanda zirimo gukunda Igihugu n'abagituye no kurangwa n'ubutwari.

Mu byaranze ibirori byo kwizihiza uyu munsi mukuru harimo guhemba abagore batanu bagaragaje ibikorwa by’indashyikirwa mu buhinzi, ubworozi, imiyoborere myiza, imari n’ikoranabuhanga; buri wese akaba yahawe ibihumbi 500 by'amafaranga y’u Rwanda.

Habayeho kandi koroza imiryango ine Inka, gutanga ubufasha bw'ibiribwa byunganira gahunda yo kurwanya imirire mibi n’igwingira ry’abana bato no guha abana amata.