Kuri uyu wa gatanu tariki 01 Werurwe 2024, mu Karere ka Burera hatangirijwe ku rwego rw’Intara y’Amajyarugu ukwezi kwahariwe ibikorwa by'Ingabo, Polisi y'u Rwanda n’izindi nzego z’umutekano byo gufasha abaturage mu mibereho myiza n'iterambere. Kubitangiza ku rwego rw'Akarere byabereye mu Kagari ka Nyamabuye, mu Murenge wa Kagogo.

Insanganyamatsiko y'ukwezi kwahariwe ibikorwa by'izi nzego muri uyu mwaka igira iti :"Imyaka 30 yo kwibohora, ku bufatanye bw'Ingabo z'Igihugu, inzego z'umutekano n'abaturage mu iterambere ry'u Rwanda."

Umushyitsi mukuru muri iki gikorwa cyo gutangiza ukwezi kwahariwe ibikorwa by'Ingabo, Polisi y'u Rwanda n’izindi nzego z’umutekano mu Karere ka Burera ni Umuyobozi wungirije wa Polisi y’u Rwanda ushinzwe ubutegetsi n'abakozi, DCGP, Jeanne Chantal UJENEZA. Uyu muhango witabiriwe n'Umuyobozi mukuru w’Ikigo cy’Igihugu gishinzwe imikurire no kurengera umwana, INGABIRE Assoumpta n’abandi bayobozi mu nzego zitandukanye barimo Ingabo, Polisi n’izindi nzego z’umutekano ku rwego rw’Igihugu, Intara y’Amajyaruguru no ku rwego rw’Akarere ka Burera.

Abashyitsi bitabiriye igikorwa cyo gutangiza ukwezi kwahariwe ibikorwa by'Ingabo, Polisi y'u Rwanda n’izindi nzego z’umutekano mu Karere ka Burera bakiriwe n'Umuyobozi w'Akarere ka Burera, MUKAMANA Soline wari kumwe n’Umuyobozi w’Akarere wungirije ushinzwe imibereho myiza y’abaturage, MWANANGU Theophile, Umuyobozi wa Polisi mu Karere, SSP Aphrodis NKUNDINEZA, Umuyobozi w’Inkeragutaba mu Karere, Lt Col. Fred NYIRINKWAYA n'abandi bayobozi mu Karere ka Burera

Umuhango wo gutangiza ukwezi kwahariwe ibikorwa by’izi nzego waranzwe no gushyira ibuye ry'ifatizo ahari kubakwa urugo mbonezamikurire rw'abana batoya mu Kagari ka Nyamabuye, mu Murengewa Kagogo no gushyikiriza sheki ya 5,000,000 Frw imboni z'impinduka za Kagogo; Imboni z'impinduka bakaba ari itsinda ry’abagororewe mu Kigo Ngororamuco cya Iwawa.

Mu ijambo rye, Umuyobozi w’Akarere, MUKAMANA Soline  yagize ati:" Akarere ka Burera tunejejwe no kuba  mwaje kwifatanya natwe mu gikorwa cyo gutangiza ibikorwa by’Ingabo na Polisi  y’u Rwanda ku bufatanye n’izindi nzego mu iterambere ry’imibereho myiza y’Abaturage; ku rwego rw’Intara y’Amajyaruguru bikaba byatangirijwe muri aka Karere".

Umuyobozi w’Akarere yakomeje agira ati:"Si ubwa mbere tugiye gufatanya n’Ingabo na Polisi mu bikorwa by’iterambere kuko mu mwaka ushyize, ubu bufatanye bwasize ibikorwa twishimira birimo urugo mbonezamikurire rw’abana batoya mu Murenge wa Nemba, kubaka inzu y’umuturage utishoboye mu Murenge wa Kinyababa n’ibindi bikorwa byinshi mu Mirenge itandukanye.

Yagize kandi ati:" Mu izina ry’abaturage b’Akarere ka Burera, ndagira ngo nshimire ibikorwa byiza byakozwe mu Karere ka Burera ndetse n’ibiteganywa gukorwa ku bufatanye bw’Ingabo, Polisi y'u Rwanda n’izindi nzego z’umutekano byateje kandi bizateza imbere abatuye Akarere ka Burera harimo igikorwa cyo kubaka urugo mbonezamikurire y’abana batoya mu Kagari ka Nyamabuye kizafasha kwita ku buzima n’uburere bw’abana batoya; hakaba kandi n’ubufasha bwa Miliyoni eshanu z’amafaranga y’u Rwanda (5,000,000 Frw) mwahaye Imboni z’impinduka za Kagogo azabafasha kurushaho kwiteza imbere; nkaba nsoje mbizeza ko tuzakomeza gufatanya kurwana urugamba rwo kubaka igihugu, duharanira kwigira no kwihesha agaciro."

Mu butumwa bwe, DCGP UJENEZA yagize ati:" Uyu ni umunsi ukomeye, umunsi dutangijeho ibikorwa byo kubaka Igihugu no guteza imbere imibereho myiza y’abaturage ku bufatanye bw’Ingabo z’Igihugu, Polisi y’u Rwanda, izindi nzego z’umutekano n’abaturage. Ni ibikorwa twatangije mu gihugu hose bizamara igihe cy’amezi atatu. Nkuko Ingabo z’Igihugu zabitojwe kuva cyera no mu gihe cy’urugamba rwo kubohora Igihugu, Umugaba w’Ikirenga w’Ingabo ari we Nyakubahwa Perezida wa Repuburika, Paul Kagame yatanze icyerekezo cy’uko Ingabo z’u Rwanda zigomba kuba umusingi w’iterambere ry’u Rwanda. Ku bufatanye n’abaturage n’izindi nzego z’ Umutekano, icyerekezo yatanze kigenda gishyirwa mu bikorwa."

DCGP UJENEZA yagize kandi ati:"Turashima cyane icyizere n’ubufatanye abaturage badahwema kugaragariza inzego z’umutekano, n’uruhare rukomeye bagira mu kubungabunga umutekano w’Igihugu. Ubufatanye butajegajega Ingabo n’izindi nzego z’umutekano zifitanye n’abaturage ni byo bituma Igihugu cyacu gifite umutekano usesuye ari na wo utuma tubasha gukora ibikorwa biduteza imbere."

Yagize na none ati:" Kuva mu mwaka wa 2009 twatangije ibikorwa byitiriwe Ingabo (Army Week) ndetse n’izindi nzego z’umutekano nka Polisi hamwe n’izindi nzego zabifatiyeho urugero ku buryo buri mwaka izi nzego zose dufatanya n’abaturage mu bikorwa by’umwihariko byo kubaka igihugu. Ni ibikorwa byagaragaje umusaruro ukomeye ku gihugu kandi bizamura ubusabane n’ubufatanye hagati y’inzego z’umutekano n’abaturage."

Ijambo rye yarikomeje agira ati:"Turashimira cyane Inzego zitandukanye z’Igihugu zidufasha kugira ngo ibi bikorwa tubigereho, tukanashimira abaturage by’umwihariko bakomeza kutwereka ko badushyigikiye aho dufatanya mu bikorwa bitandukanye dukora birimo kubaka amashuri, kuvura abaturage tubasanze aho batuye mu Turere dutandukanye, kubagezaho amashanyarazi n’amazi, kubakira abatishoboye, kubaka imihanda n’ibiraro, kurengera ibidukikije haterwa amashyamba, imirwanyasuri, ubufatanye mu bikorwa by’ubuhinzi n’ubworozi n’ibindi tutarondora."

DCGP UJENEZA yagarutse ku bizakorwa uyu  mwaka agira ati:" By’umwihariko uyu mwaka tuzakora ibikorwa mu Turere dutandukanye tw’Igihugu birimo kubakira abatishoboye aho duteganya kubaka inzu 31 tukanazishyiramo ibikoresho by’ibanze, kubaka amashuri y’abana b’incuke 15, koroza abaturage amatungo aho duteganya gutanga amatungo y’ingurube 800 mu baturage, kuvura, ibikorwremezo birimo kugeza amazi n’amashanyarazi ku baturage aho duteganya gutanga imirasire ku ngo 327, kubaka ibiraro 13, ndetse n’ubwato 4 buzahabwa abaturage".

Yasoje ijambo rye agira atai:"Muri ibi bikorwa byose tuzakora, icyo dusaba abaturage, ubuyobozi bw’inzego z’ibanze, inzego nkuru za Leta, amadini n’imiryango itari iya Leta, ni ubufatanye kugira ngo tuzabashe kugera ku ntego twihaye. Twese icyo duharanira ni uko igihugu cyacu cyarushaho gutera imbere, umuturage akabaho mu buzima bwiza.

Harakabaho ubuyobozi bwiza bureberera abaturage. Harakabaho abaturage bafite ubuzima bwiza.Harakabaho ubufatanye bw’abaturage,Ingabo n’izindi nzego z’umutekano."