Kimwe n’ahandi mu Gihugu, tariki 07 z’uku Kwezi; mu Karere ka Burera bahaye ibikorwa byo kwibuka ku nshuro ya 29 Jenoside yakorewe Abatutsi mu Rwanda mu mwaka wa 1994 ku nsanganyamatsiko igira iti: "Kwibuka Twiyubaka".

Gutangiza icyumweru cy’icyunamo cyo kwibuka ku nshuro ya 29 Jenoside yakorewe Abatutsi mu Rwanda mu mwaka wa 1994 byabereye ku Rwibutso rwa Jenoside yakorewe Abatutsi rw’Akarere rwa Rugarama; ruherereye mu Murenge wa Rugarama; naho guzoza iki cyumweru byabereye ku Rwibutso rwa Jenoside yakorewe Abatutsi ruri mu Murenge wa Rusarabuye.

Umuhango wo gutangiza icyumweru cy’icyunamo cyo kwibuka ku nshuro ya 29 Jenoside yakorewe Abatutsi witabiriwe na Honorable Senateri Faustin HABINEZA; ari na we wari Umushyitsi mukuru; abagize Komite Nyobozi, abagize inama y'umutekano itaguye y'Akarere, abagize Inama Njyanama y'Akarere, abahagarariye izindi nzego mu Karere, Abakozi b'Akarere n'Abaturage.

Mu byaranze umuhango wo gutangiza icyumweru cy’icyunamo cyo kwibuka ku nshuro ya 29 Jenoside yakorewe Abatutsi harimo gushyira indabo ku Rwibutso rwa Jenoside yakorewe Abatutsi rwa Rugarama, ijambo ry'ikaze ry'Umuyobozi w'Akarere, Mme UWANYIRIGIRA Marie Chantal, ikiganiro ku mateka ya Jenoside yakorewe Abatutsi, ubuhamya bw'umwe mu barokotse Jenoside yakorewe Abatutsi muri 1994 n'ubutumwa bw'uhagarariye IBUKA ku rwego rw'Akarere.

Mu butumwa Honorable Senateri HABINEZA yagejeje ku bitabiriye uyu muhango yihanganishije Abarokotse Jenoside yakorewe Abatutsi bo mu Karere ka Burera; asaba abawitabiriye kwirinda ingengabitekerezo ya Jenoside no kugira uruhare mu kuyirwanya bakangurira abayifite kuyireka. Yashimye kandi gahunda za Leta zigamije iterambere ry’u Rwanda n’imibereho myiza y’Abaturage.

Mu buhamya bw’umwe mu barokotse Jenoside yakorewe Abatutsi wo mu Karere ka Burera, MUHIMPUNDU Tabiya yagaragaje inzira y’umusaraba yanyuzemo muri Jenoside yakorewe Abatutsi; ashima izari Ingabo za RPF/Inkotanyi n’Umukuru w’Igihugu, Nyakubahwa Paul KAGAME wari uziyoboye ku kubarokora.

Yashimye kandi Umukuru w’Igihugu ku bwa gahunda z’iterambere n’isanamitima zigenewe Abarokotse Jenoside yakorewe Abatutsi; agaragaza ko ataheranwe n’amateka y’ibyo yakorewe muri Jenoside; ahubwo ko akomeje inzira y’Ubumwe n’Ubudaheranwa bw’Abanyarwanda ndetse n’inzira y’iterambere n’imibereho myiza.

Nyuma y'ijambo ry'Umushyitsi mukuru; abitabiriye uyu muhango bakurikiye ubutumwa bw'Umukuru w'Igihugu.

Umuhango wo gusoza icyumweru cy’icyunamo cyo kwibuka ku nshuro ya 29 Jenoside yakorewe Abatutsi (13/04/2024) waranzwe no gufata umunota wo kwibuka abazize Jenoside yakorewe Abatutsi, gushyira indabo ku Rwibutso rwa Jenoside yakorewe Abatutsi ruri mu Murenge wa Rusarabuye mu rwego rwo guha icyubahiro abazize Jenoside yakorewe Abatutsi bahashyinguye, ijambo ry'ikaze ry'Umuyobozi w'Akarere yakira abitabiriye uyu muhango, ikiganiro ku mateka ya Jenoside yakorewe Abatutsi mu Rwanda mu mwaka wa 1994, ijambo ry'Umuyobozi wa IBUKA ku rwego rw'Akarere n'ubutumwa bw'Umunyamabanga Nshingwabikorwa w'Intara y'Amajyaruguru, Dr Geoffrey MUSHAIJA; wari uhagarariye Guverineri w'Intara y'Amajyaruguru muri uyu muhango.

Mu butumwa Dr MUSHAIJA yagejeje ku bitabiriye uyu muhango yabasabye kwirinda ingengabitekerezo ya Jenoside yakorewe Abatutsi no kugira uruhare mu kuyirwanya; kandi bakimakaza gahunda ya NDI UMUNYARWANDA; hagamijwe Ubumwe n'Ubudaheranwa bw'Abanyarwanda