Kuri uyu wa gatanu tariki 02 Kanama uyu mwaka; mu Midugudu igize Akarere ka Burera habereye ibirori byo kwizihiza umunsi mukuru w'umuganura wizihijwe ku insanganyamatsiko igira iti:"Umuganura, isoko y'ubumwe n'ishingiro ryo kwigira. Tuganure dushyigikire gahunda yo kugaburira abana ku ishuri."

Umuyobozi w'Akarere, MUKAMANA Soline yifatanyije n'abaturage b'Umurenge wa Rusarabuye mu birori byo kwizihiza uyu munsi mukuru byabereye ku biro by'Akarere,  mu Kagari ka Kabona, Umuyobozi w'Akarere wungirije ushinzwe iterambere ry’ubukungu, NSHIMYIMANA Jean Baptiste yifatanyije n'Ubuyobozi n'abaturage b'Umurenge wa Gahunga mu birori byo kwizihiza uyu munsi mukuru byabereye mu Kagari ka Buramba, mu Mudugudu wa Gafatangwe, Umuyobozi w'Akarere wungirije ushinzwe imibereho myiza y’abaturage, MWANANGU Théophile yifatanyije n'abaturage n'Ubuyobozi by'Umurenge wa Kivuye kwizihiza uyu munsi mukuru byabereye mu Kagari ka Murwa, mu Mudugudu wa Rucyamo; naho Umuyobozi wa Polisi mu Karere, Senior Superintendent of Police (SSP) Aphrodis NKUNDINEZA yifatanyije n'abaturage n'Ubuyobozi bw'Umurenge wa Cyanika mu birori byo kwizihiza uyu munsi mukuru byabereye mu Kagari ka Kagitega, mu Mudugudu wa Kidaho.

Abitabiriye ibi birori basabanye; basangira kandi amafunguro agizwe n'indyo gakondo zitandukanye. Habayeho kandi guha abana amata no kuganuza abatarahiriwe n'umusaruro.

Mu butumwa Umuyobozi w'Akarere, MUKAMANA Soline yagejeje ku baturage b'Umurenge wa Rusarabuye bitabiriye ibirori byo kwizihiza uyu munsi mukuru bwatanzwe n'abayobozi bavuzwe hejuru ndetse n'ahandi habereye ibi birori mu Karere yabashimiye kuba babyitabiriye ku bwinshi; abasobanurira ko kwizihiza umuganura bigamije kwereka Abanyarwanda uruhare rw’umuganura mu kunga no gushimangira ubumwe bwabo birinda icyabubangamira, gushishikariza Abanyarwanda kurushaho gushyira hamwe imbaraga, gufashanya no gutabarana mu mibereho yabo no gushishikariza  buri wese kugira uruhare mu ishyirwa mu bikorwa rya gahunda ya Leta yo kuganurira abana ku ishuri saa sita zo ku manywa.

Yagize ati:"Muri iki gihe, kwizihiza umuganura byarenze kwishimira umusaruro uturuka ku buhinzi n’ubworozi; byageze no mu zindi nzego zireba ubuzima bw’Igihugu muri rusange, hagamijwe guha agaciro urugendo rwo kwiteza imbere Abanyarwanda turimo, mu nzego zinyuranye; harimo ubukungu, ubuzima, uburezi, ikoranabuhanga, imikino n’imyidagaduro, ubucuruzi, ubucukuzi bw’amabuye y’agaciro, ibikorwaremezo, inganda ndangamuco, ubukerarugendo n’ibindi bigamije iterambere ry’imibereho myiza y’umuturage n’Igihugu muri rusange."

Umuyobozi w'Akarere yagize kandi ati:"Uyu munsi ni umunsi wo kugaruka ku isanomuzi Abanyarwanda twese; mu byiciro bitandukanye dufitanye,,twishimira umusaruro uturuka mu mirimo y’amaboko n’ubwenge byacu nk’Abanyarwanda. Ni umunsi wo kuganira, kujya inama no kuvuga ibigwi n’ubutwari bishingiye ku intambwe igenda iterwa, ari nako abejeje baganuza abatarahiriwe n’ibihe."

Yabakanguriye kwizigamira muri Ejo Heza, gutanga Mituweli ya 2024-2025, kwitegura neza igihembwe cy’ihinga, kwipimisha indwara zitandura, kubahiriza amabwiriza agamije gukumira no kurwanya indwara y'Ubushita bw'Inkende, kurwanya imirire mibi n’igwingira, guteza imbere isuku n’isukura, kubumbatira ubumwe bw'Abanyarwanda binyuze muri gahunda ya Ndi Umunyarwanda no kwirinda amakimbirane n'ibiyobyabwenge.

Yasabye urubyiruko kwitabira gahunda y’Intore mu biruhuko, asaba ababyeyi kohereza abana bo mu mwaka wa mbere kugera mu wa 3 w'amashuri abanza batatsinze neza Ikinyarwanda n'Icyongereza muri 2023-2024 no kwitabira gahunda nzamurabushobozi.