Kuri iki cyumweru tarii 02 Gashyantare 2026, mu Mirenge igize Akarere ka Burera habereye ibirori byo kwizihiza Umunsi w'Intwari z'Igihugu wizihijwe ku nshuro ya 32 ku nsanganyamatsiko igira iti:"Ubutwari n'Ubumwe bw'Abanyarwanda, inkingi z'iterambere." 

Umuyobozi w'Akarere, Mukamana Soline , Perezida w'Inama Njyanama y'Akarere, Bizimungu Jean Baptiste, Umuyobozi w'Inkeragutabara mu Karere, Lt Col. Viateur Rutagemgwa, Umuyobozi wa Polisi mu Karere,SP Viateur Gakara Munyurasi n'Umuyobozi wungirije wa DASSO ku rwego rw'Akarere , Sakindi Jean Damascène bifatanyije n'abaturage b'Umurenge wa Bungwe mu birori byo kwizihiza uyu munsi mukuru byabereye mu Kagali ka Bungwe.

Mu butumwa bwe, Umuyobozi w'Akarere yasabye abitabiriye ibirori kumufasha gushima Intwari z'Igihugu zitangiye u Rwanda n'Abaturarwanda mu bihe binyuranye; abasaba kurangwa n'ibikorwa by'ubutwari, gukunda Igihugu n'abagituye no guharanira ko gikomeza gutera imbere. Yabasabye kumufasha gushima Nyakubahwa Perezida wa Repubulika, Paul Kagame wayoboye Ingabo za Rwanda Patriotic Army (RPA) zabohoye  Igihugu, zihagarika Jenoside yakorerwaga Abatutsi, ku mutekano Igihugu gifite, imiyoborere myiza, ubumwe bw'Abanyarwanda n'iterambere akomeje kugeza ku Baturarwanda n'Igihugu muri rusange.

Yabasabye gukomeza kwitabira gahunda za Leta zinyuranye zigamije iterambere ry'imibereho y'abaturage n'iterambere ry'Igihugu muri rusange harimo kunganira gahunda yo kugaburira abana ku ishuri, kwitabira umuganda, inteko z'abaturage no kubumbatira umutekano. 

Umuyobozi w’Akarere wungirije ushinzwe iterambere ry’ubukungu, Nshimyimana Jean Baptiste yifatanyije n'abaturage b'Umurenge wa Kinoni kwizihiza uyu munsi mukuru byabereye mu Kagali ka Nkumba, naho Umunyamabanga Nshingwabikorwa w'Akarere, Karangwa James yitabiriye ibyo birori mu Murenge wa Cyanika byabereye mu Kagali ka Gisovu.