Kuri iki cyumweru tariki 31 Kanama 2024, mu Karere Burera habereye isiganwa ryo gutwara igare ryateguwe mu rwego rw'ubukangurambaga ku kubungabunga igishanga cy'Urugezi n'urusobe rw'ibinyabuzima bibamo. Iki gishanga gikora ku Mirenge itandatu y'Akarre ka Burera n'ibiri y'Akarere ka Gicumbi.

Iri siganwa ryateguwe ku bufatanye bw'Akarere ka Burera, Rwanda Wildlife Conservation Association n'Ishyirahamwe ry'umukino w'amagare mu Rwanda. Ryitabiriwe n'abatwara igare by'umwuga 31 (Abagabo 26 n'abagore 5) basiganwe kuri 89.1km; abatarabigize umwuga 20 (Abagabo 16 n'abagore 4) basiganwe kuri 46km n'abakoresheje igare ry'ubwoko bwa Pine balo 74 (Abagabo 65 n'abagore 9) basiganwe kuri 37km.

Abakinyi batatu bakinira ikipe y'amagare yo mu Karere ka Burera yitwa Twin Lakes Cycling Club baje muri batanu ba mbere mu cyiciro cy'abatarengeje imyaka 18 y'amavuko bitabiriye isiganwa babigize umwuga. Abo ni BANZI Bukhari wabaye uwa gatatu; wahawe umudari w'umuringa, NIZEYIMANA Fiacre wabaye uwa kane na NSHIMIYIMANA Phocas wabaye uwa gatanu.

Umuyobozi w’Akarere wungirije ushinzwe iterambere ry’ubukungu, NSHIMYIMANA Jean Baptiste n’umuyobozi wako wungirije ushinzwe imibereho myiza y’abaturage, MWANANGU Théophile bakurikiye iri siganwa.

Mu ijambo rye, muyobozi w’Akarere wungirije ushinzwe iterambere ry’ubukungu, NSHIMYIMANA Jean Baptiste NSHIMYIMANA Jean Baptiste yashimye inzego zagize uruhare mu itegurwa ry'iri siganwa, ashimira abakinnyi baryitabiriye, asaba abaturage barikurikiye kugira isuku umuco, gutanga umusanzu wa Mituweli, kwirinda ibiyobyabwenge, amakimbirane n'ubusinzi, kwitegura neza igihembwe cy'ihinga cya 2025A, kuzohereza abana bose biga ndetse n'abageze igihe cyo kwiga ku ishuri no kubahiriza amabwiriza agamije kwirinda indwara y’Ubushita bw’Inkende.