Kuri uyu wa gatandatu, mu Tugari tugize Akarere habereye Umuganda rusange usoza uku kwezi kwa Werurwe 2025. Waranzwe ahanini n'ibikorwa by'isuku n'isukura byabereye ahantu hanyuranye.

Umuyobozi w'Akarere, Mukamana Soline, Honorable Senateri Usta Kayitesi; Visi Perezida w’Inama Njyanama y’Akarere, Uwamwiza Catherine, abagize Komite Nyobozi y'Akarere, Inzego zinyuranye zikorera mu Karere n'abaturage b'Umurenge wa Rusarabuye n'uwa Cyeru bakoze isuku ku Rwibutso rwa Jenoside yakorewe Abatutsi mu 1994 ruri mu Murenge wa Rusarabuye.

Mu kiganiro Honorable Senateri Usta Kayitesi n'Umuyobozi w'Akarere bagiranye n'abaturage b'iyo Mirenge bitabiriye umuganda; babakanguriye kuzitabira no kuzakurikira gahunda ziteganyijwe mu cyumweru cy’icyunamo cyo kwibuka ku nshuro ya 31 Jenoside yakorewe Abatutsi mu 1994; kubumbatira ubumwe bw’Abanyarwanda; birinda, kandi barwanya ingengabitekerezo ya Jenoside.

Mu ijambo rye, Umuyobozi w'Akarere, Mukamana Soline yabwiye abitabiriye umuganda ati:" Dukwiriye twese gufatanya kurwanya no gukumira icyo ari cyo cyose cyabangamira ubumwe bwacu; tukimakaza gahunda ya Ndi Umunyarwanda yo sano muzi iduhuza."

Kuri uyu munsi kandi, ku Rwibutso rwa Jenoside rw’Akarere ruri mu Murenge wa Rugarama na ho hakorewe isuku.